Žurnalistki Śviatłana Kalinkina, Natalla Radzina i Iryna Chalip, u jakich u sakaviku prajšli vobyski, 2 krasavika byli vyklikanyja va UUS Pieršamajskaha rajona Minska, dzie ź imi pravioŭ hutarku staršy daznavalnik upraŭleńnia ŭnutranych spraŭ Homiela Alaksandr Pusieŭ.
Jak paviedamiła ŭłasny karespandent rasijskaj «Novoj haziety» Iryna Chalip, Pusieŭ aznajomiŭ jaje z pastanovaj ab pryznačeńni techničnaj ekśpiertyzy kanfiskavanych pry vobysku ŭ jaje kvatery kampjutera i nośbitaŭ infarmacyi. «Pracedura zajmaje miesiac. Ale kali jana pracajomkaja, to terminy mohuć padaŭžacca da biaskoncaści. Kali prymuć rašeńnie ab dałučeńni da spravy ŭ jakaści dokazaŭ, to rečy nie viernuć nikoli. Tak što ja nie vielmi spadziajusia», — skazała Chalip.
U svaju čarhu šef-redaktar haziety «Narodnaja vola» Śviatłana Kalinkina adznačyła, što dopytu nie było. «Mnie viarnuli maje zapisnyja knižki. Choć jašče ranicaj ja atrymała list ad daznavalnika Pusieva, što ich nie viernuć, bo zapisnyja knižki jašče nie daśledavanyja. Mnie skazali, što dyktafon mnie nie viernuć, bo jon dałučany da spravy ŭ jakaści rečyŭnaha dokazu — mianie heta naściarožyła. Ja dobra viedaju, što tam niama, nie było i nie mahło być ničoha, źviazanaha z hienierałam KDB Ivanam Karžom ci «palaŭničaj spravaj», — skazała Kalinkina.
Pavodle jaje słoŭ, pryznačana ekśpiertyza kanfiskavanych u jaje pry vobysku ŭ kvatery kampjutera i dvuch noŭtbukaŭ, a taksama kanfiskavanych u ofisie rabočaha kampjutera i nośbitaŭ infarmacyi. «Skazali, što ekśpiertyza jašče nie pravodziłasia. Ja paprasiła, kab mnie dazvolili prysutničać na ekśpiertyzie. Ale Pusieŭ admoviŭ, rastłumačyŭšy, što maja prysutnaść moža pieraškodzić abjektyŭnaści ekśpiertyzy», — skazała Kalinkina.
U toj ža čas žurnalistka sajta «Chartyja'97» Natalla Radzina paviedamiła, što jaje dopyt, jaki taksama pravodziŭ daznavalnik Pusieŭ, doŭžyŭsia kala dźviuch z pałovaj hadzin. «Było šmat pytańniaŭ pra Ivana Karža i apublikavany list svajakoŭ milicyjanieraŭ, jakija prachodziać pa «palaŭničaj spravie», ale taksama było vielmi šmat pytańniaŭ ab pracy našaha sajta. Mnie zdajecca, heta cikaviła daznavalnika bolš», — skazała Radzina.
Jaje taksama aznajomili z pastanovaj ab praviadzieńni ekśpiertyzy kanfiskavanych pry vobysku ŭ ofisie «Chartyja'97» vaśmi kampjuteraŭ.
***
Nahadajem, u lutym—sakaviku supracoŭniki milicyi praviali šerah vobyskaŭ u redakcyjach niedziaržaŭnych ŚMI i kvaterach žurnalistaŭ. Vobyski adbylisia ŭ ofisach sajta «Chartyja'97» i haziety «Narodnaja vola», u žurnalistaŭ Iryny Chalip, Śviatłany Kalinkinaj, Maryny Koktyš. U ich byli kanfiskavanyja sistemnyja błoki kampjuteraŭ i elektronnyja nośbity infarmacyi.
Aficyjnaj padstavaj dla vobyskaŭ stała kryminalnaja sprava ab paklopie ŭ dačynieńni da byłoha načalnika ŭpraŭleńnia KDB pa Homielskaj vobłaści Ivana Karža, jaki ciapier zajmaje pasadu načalnika UKDB pa Hrodzienskaj vobłaści. Heta sprava źviazana z tak zvanaj palaŭničaj spravaj, u asnovie jakoj — kanflikt pamiž siłavymi strukturami ŭ Homielskaj vobłaści.
Akramia taho, niadaŭna stała viadoma, što redaktar sajta «Biełaruski partyzan» Pavieł Šaramiet pazbaŭleny hramadzianstva Biełarusi na padstavie taho, što 10 hadoŭ tamu jon atrymaŭ hramadzianstva rasijskaje.
Sami žurnalisty ličać padobnyja dziejańni ŭład uciskam na niezaležnyja biełaruskija ŚMI.
Pieraśled žurnalistaŭ u Biełarusi asudzili pravaabarončyja arhanizacyi i aficyjny pradstaŭnik Jeŭrasajuza. «ES hłyboka zaniepakojeny ŭciskam na pradstaŭnikoŭ niezaležnych ŚMI», — zajaviła 30 sakavika viarchoŭny pradstaŭnik Jeŭrasajuza pa źniešnich suviaziach Ketryn Eštan.
