Tankier z 80 tys. tonaŭ vieniesuelskaj nafty, pryznačanaj dla pierapracoŭki na Mazyrskim NPZ, vyjšaŭ ź Vieniesueły 2 krasavika, paviedamlaje Reuters sa spasyłkaj na pradstaŭnika MNPZ. Pa słovach krynicy, syravina budzie płyć 28 dzion.
U svaju čarhu, krynica ŭ adeskim porcie paviedamiła, što sustreča tankiera ź vieniesuelskaj naftaj čakajecca 23 krasavika.
Biełaruskija ŭłady śćviardžajuć, što hetaja partyja nafty źjaŭlajecca probnaj — jana dazvolić adpracavać łahistyku pastavak i vyznačyć techničnyja mahčymaści biełaruskich NPZ pa jaje pierapracoŭcy. Adnak siońnia ŭžo nichto nie sumniajecca ŭ tym, što asnoŭnaja meta probnaj pastaŭki zvodzicca da adnaho — zrazumieć i pradbačyć mahčymuju reakcyju Rasii na takoje supracoŭnictva Biełarusi i Vieniesueły.
Da techničnych mahčymaściaŭ biełaruskich NPZ pytańniaŭ niama — u Biełaruś budzie pastaŭlacca lohkaja «santa‑barbara» ź nizkim utrymańniem siery.
Niama pytańniaŭ i da łahistyki. Imparcioram vieniesuelskaj nafty vystupić ZAT «Biełaruskaja naftavaja kampanija». Pa słovach pradstaŭnika BNK, cana vieniesuelskaj nafty budzie vyznačacca zychodziačy ź biržavych katyrovak i pastaŭlacca ŭ adeski port na ŭmovach apłaty koštu frachta i strachoŭki.
«Ciapier śpiecyjalisty kampanii adpracoŭvajuć maksimalna efiektyŭnyja schiemy na kožnym z etapaŭ», — skazaŭ pradstaŭnik BNK.
Kali, praŭda, nie zadumvacca, a što ž nasamreč jašče treba adpracoŭvać. Frachty viadomyja. Adeski port daŭ bolš čym ilhotnyja rascenki na pieravałku nafty. Niaŭžo pradstaŭniki BNK źbirajucca pa siekundamiery zasiakać čas prachodu tankiera praź pierahružany Basforski praliŭ? Ci, moža być, chočuć ruletkaj pamieryć daŭžyniu čyhunačnaha pierahonu z Adesy ŭ Mazyr? Ale i ŭ hetym sensu niama — Ukraina paabiacała źnižki na čyhunačnyja taryfy až da momantu zapusku ŭ aviersie naftapravodu Adesa‑Brody.
Usio ŭžo praličana, pierapravierana i sumlenna padzielena. Nie pryśniłasia ž pieršamu vice‑premjeru U. Siamašku ličba ŭ 61 dalar čystaha prybytku na tonie vieniesuelskaj nafty — hetuju ličbu jon ahučyŭ u efiry biełaruskaha TB. Navar niadrenny, ale jaho vieličynia dazvalaje zrabić vysnovu ab tym, što pra biržavyja katyroŭki i havorki być nie moža.
Biassprečna, biełaruski siabar Uha Čavies — jašče toj rybak («voś taki voś ščupak» — razvodzić ruki šyrej). Ale ž jon taksama nie na pustym miescy viaščaŭ na ŭvieś śviet pra hatoŭnaść z maja pastaŭlać u Biełaruś pa 11 tys tonaŭ nafty ŭ sutki, vyjšaŭšy da kanca hodu na 4 młn tonaŭ.
Chutčej za ŭsio, udzieł BNK u pastaŭkach vieniesuelskaj nafty nosić časovy charaktar — da taho času, pakul nie budzie stvoranaje biełaruska‑vieniesuelskaje SP pa pastaŭcy nafty ŭ Biełaruś.
A SP budzie stvoranaje tolki pry najaŭnaści harantyj, što Rasija ŭ adkaz na praktyčnuju realizacyju biełaruska‑vieniesuelskaj družby nie pierahledzić abjomy nafty, jakaja pastaŭlajecca ŭ Biełaruś biez mytaŭ, z 6,3 młn. da 2,3 młn. ton. Takija harantyi A. Łukašenka vielmi choča atrymać na chutkaj sustrečy z prezidentam RF Dz. Miadźviedzievym.
