14 krasavika ŭ Muziei sučasnaha vyjaŭlenčaha mastactva ŭ Minsku adkryŭsia fiestyval Art.Intouch.
U ekspazicyi, jakaja raźmiaściłasia va ŭsich załach muzieja, pakazana amal 200 mastackich tvoraŭ.
Jak adznačyła dyrektar muzieja Natalla Šaranhovič, tvorčaja akcyja arhanizavana ŭstanovaj pry padtrymcy Instytuta Hiote ŭ Minsku. Pavodle jaje słoŭ, fiestyval — heta vystava karcin i skulptury, tvoraŭ dekaratyŭna‑prykładnoha mastactva i fatahrafij, heta muzyka, teatr, litaratura, heta vielizarnaje dziejstva, jakoje budzie demanstravacca štodnia da 30 krasavika ŭ załach muzieja, a z 20 krasavika — jašče i ŭ Nacyjanalnaj škole pryhažości.
Kandydat mastactvaznaŭstva Jaŭhien Šuniejka padkreśliŭ, što prajekt zaklikany pakazać dynamiku biełaruskaha mastactva ŭ pieršym dziesiacihoddzi XXI stahoddzia. U ekspazicyi — tvory aŭtaraŭ, jakija vyznačajucca strymanaściu i ścipłaściu, tonkaściu, samapahłyblenaściu, prastatoj i łapidarnaściu ŭ staŭleńni da hledača, skazaŭ mastactvaznaŭca. Pavodle jaho słoŭ, fiestyval pavinien sfarmiravać pole dla dyjałohu mastakoŭ i mastactvaznaŭcaŭ, krytykaŭ i žurnalistaŭ, kamiersantaŭ i miecenataŭ, tamu ŭ prahramu tvorčaj akcyi ŭklučany kruhłyja stały, prezientacyi časopisaŭ i knih, pierformansy, lekcyi, vystupleńni muzykantaŭ, duel paetaŭ, litaraturny forum, demanstracyi videaarta i karotkamietražnaha kino.
Jak adznačyŭ Šuniejka, fiestyval daść mahčymaść nie tolki pakazać aktualny mastacki kantekst pieršaha dziesiacihoddzia stahoddzia, ale i abjadnać u adno asiaroddzie pradstaŭnikoŭ roznych pakaleńniaŭ, a taksama vyjavić znakavyja piersanalii. Pavodle jaho słoŭ, tvorčaja akcyja dazvolić pakazać uzajemasuviazi vidaŭ i kirunkaŭ mastactva, materyjałaŭ i techniki, pakaleńniaŭ, pazicyj i adnosin.
U adkryćci fiestyvalu ŭziali ŭdzieł hurty «Kniaź Myškin» i Re123+, a taksama ahniavy cyrk «Kresiva».
