Franak Viačorka źbirajecca sudzicca ź lekarami, vajskoŭcami dy dziaržaŭnymi žurnalistami i patrabavać ad ich prabačeńniaŭ dy kampiensacyi.
Nahadajem, 14 krasavika jaho kamisavali pastanovaj hałoŭnaha miedyčnaha centru Minabarony. Miedyki vyjavili ŭ Viačorki kambinavanuju zahanu serca. Z hetkim dyjahnazam junak nie tolki nie prydatny da słužby, ale i ŭvohule pavinien być vyklučany z vajskovaha ŭliku.
U razmovie Franak padkreśliŭ, što ŭ zaklučnym dyjahnazie lekary napisali, niby chvaroba nabytaja ŭ vojsku — kab užo były žaŭnier nie moh sudzicca za niezakonny pryzyŭ. Adnak Viačorka z hetym kateharyčna nie zhodny i źbirajecca źviarnucca ŭ sud.
«Budu patrabavać pryciahnieńnia da adkaznaści lekaraŭ, jakija falsifikavali dyjahnazy, i pryzyŭnoj kamisii, jakaja mianie zabirała. Taksama budu patrabavać kampiensacyi, maralnaj i pa stanie zdaroŭja, ad vajskoŭcaŭ, a taksama ad miedykaŭ, jakija nie pryniali mieraŭ pa stanie majho zdaroŭja raniej i kamisavali mianie tolki praz 15 miesiacaŭ. Nu i ŭrešcie, budu padavać u sud na žurnalistaŭ Biełaruskaha telebačańnia i «Biełorusskoj vojennoj haziety», jakija nieadnarazova mianie źnievažali i abvinavačvali ŭ tym, što ja paprostu nie chaču słužyć. Ja dumaju, što tut nie mienš za 100 miljonaŭ rubloŭ».
Darečy, Franak Viačorka źjaŭlajecca kandydatam u deputaty ŭ Mazyrski rajsaviet. Svaju vybarčuju kampaniju były palitžaŭnier źbirajecca praciahvać.
