Nie adpaviadaje kryteram madam Jarmošynaj? Tym lepiej. Piša Andrej Dyńko.
Taki prysud Aŭtuchoviču na movie łukašenkaŭskich žestaŭ aznačaje faktyčnaje apraŭdańnie.
Piać hadoŭ za piać patronaŭ da palaŭničaj strelby – heta pasadka za ništo. Toj samy termin, jaki raniej atrymlivali Kazulin ci Marynič. Raz ty budzieš u mianie palitźniavolenym numar adzin, na tabie piać hadoŭ.
Zaŭstydalisia pravaabaroncy, jakija byli vahalisia, ci ŭvažać Aŭtuchoviča palityčnym viaźniem. Łukašenka vyrašyŭ za ich: jakraz takim i ŭvažać.
Ažyviŭsia Zachad, jaki za Aŭtuchoviča jašče patarhujecca.
Aŭtuchovič uvajšoŭ u bramu SIZA niedakazanym terarystam, a vyjdzie dakazanym hierojem. “Bo nie zdasca zmahar, nie skarycca, u niavoli nikoli nidzie”.
Čamu apazicyja nie choča razhledzieć varyjanta vyłučeńnia svaim kandydatam u prezidenty Aŭtuchoviča, jak nie razhladała paślaturemnaha Kazulina?Nie razhladała, bo nie adpaviadaje kryteram madam Jarmošynaj praz sudzimaść. Ale što nam da tych kryteraŭ, kali my chočam źmianić sistemu? Jość padstava dabivacca adnačasova vyzvaleńnia i prava bałatavacca. Miljon podpisaŭ za Aŭtuchoviča ŭ prezidenty ŭdaryć pa sistemie macniej, čym miljon hałasoŭ, adpisany madam Jarmošynaj patentavanym kandydatam ad apazicyi. Niachaj Łukašenka supierničaje sa štrejkbrechierami, a my dabivajemsia spraviadlivych vybaraŭ, a spraviadlivymi jany buduć tolki kali jany projduć na našych umovach, z našym lideram.
Niejkaja takaja taktyka – parušeńnie nakinutych režymam praviłaŭ hulni – padryvała b sistemu macniej za lehalnuju ahitacyju. Dyktatary nie prajhrajuć na praviłach, jany prajhrajuć biez praviłaŭ.
Što Aŭtuchovič byŭ by mocnym lideram, jon davioŭ.
0
0
0
0
0
0
