12-13 červienia ŭ Połacku adbudziecca fest siaredniaviečnaj kultury «Rubon», prymierkavany da 1148-hodździa horada.
U feście voźmuć udzieł kala 30 kłubaŭ histaryčnaj rekanstrukcyi ź Minska, Hrodna, Baranavič, Homiela, Viciebska, Oršy, Lidy i inšych haradoŭ Biełarusi. Uvachod na fiestyvalnuju terytoryju ŭpieršyniu stanie płatnym: dla darosłych kvitok budzie kaštavać 4 tysiačy rubloŭ. Adnak dla dziaciej uvachod zastaniecca volnym.
Na fiestyvali projduć turniry dla ciažka ŭzbrojenych łatnikaŭ i «Ratna koła» dla lohka ŭzbrojenych vajaroŭ, a taksama masavyja bitvy — buhurty. Buduć spabornictvy łučnikaŭ i vieršnikaŭ. I, kaniešnie, šturm zamka. Haściej buduć zabaŭlać staražytnymi słavianskimi hulniami, tancami ŭ sabatonach (vialikich žaleznych botach). U imprezavanym siaredniaviečnym horadzie raskinucca śviatočnyja handlovyja šerahi i kirmaš ramieśnikaŭ. 12 červienia projdzie konkurs vuličnych teatraŭ i płanujecca premjera płastyčnaha śpiektaklu «Vyprabavańnie ahniom», u jakim taetralnaja dzieja budzie spałučacca z vohniennym šou. Na sioletni «Rubon» zaprošany viadomyja muzyčnyja hurty — «Stary Olsa», «Javaryna», «Haljarda», «Cornus Copia».
Arhanizatary fiestyvalu — Połacki harvykankam i narodny teatr histaryčnaha kaściuma «Połacki źviaz».
