Načalnik adździeła pa pašpartnaj rabocie i vyjezdu za miažu Departamentu pa hramadzianstvu i mihracyi MUS Dźmitry Leŭčanka paviedamiŭ, što zaraz kolkaść asobaŭ, jakim časova zabaronieny vyjezd za miažu, składaje kala 120 tysiač čałaviek.
Kolkaść nievyjaznych budzie pastupova źnižacca. Z ustupleńniem u siłu prezydenckaha Ŭkaza №271 rašeńnie ab uniasieńni asoby ŭ bazu dadzienych nievyjaznych prymajecca na alternatyŭnaj asnovie, to bok śledčy budzie prymać rašeńnie, uklučać ci nie ŭklučać čałavieka, što znachodzicca pad śledztvam, u bazu nievyjaznych.
Da taho ž, užo pierastali ŭklučać u bazu dadzienych časova nievyjaznych ludziej, jakija znachodziacca pad aryštam albo jakija pryhavoranyja da pažyćciovaha źniavoleńnia. Na dumku spadara Leŭčanki, baza nievyjaznych moža skaracicca da 70—80 tysiač čałaviek za košt vyklučeńnia ź jaje źniavolenych.
