U Biełarusi płanujecca źnizić maksimalna dapuščalnyja pamiery štrafaŭ za pravaparušeńni ŭ śfiery ekanamičnaj dziejnaści. Adpaviednaja norma praduhledžana ŭ papraŭkach u Kodeks ab administracyjnych pravaparušeńniach, pryniatych 10 červienia pałataj pradstaŭnikoŭ u pieršym čytańni.
U pryvatnaści, paviedamiŭ dyrektar Nacyjanalnaha centra zakanadaŭstva i pravavych daśledavańniaŭ Vadzim Ipataŭ, dla fizičnych asob maksimalny štraf źnižajecca z 500 da 200 bazavych vieličyń, dla indyvidualnych pradprymalnikaŭ — z 500 da 400, dla fizičnych asob pry ździajśnieńni niekalkich administracyjnych pravaparušeńniaŭ — z 1.000 da 400.
Zakonaprajekt ustanaŭlivaje zabaronu na kanfiskacyju pradmietaŭ administracyjna-mytnaha parušeńnia, nabytych paśla jaho ździajśnieńnia asobaj, nievinavataj u jaho ździajśnieńni, kali takija pradmiety byli nabytyja ŭ roźničnym handli. Pa słovach Ipatava, heta dazvolić abaranić prava ŭłasnaści dobrasumlennych pakupnikoŭ rečaŭ, jakija raniej byli niezakonna ŭviezieny na terytoryju Biełarusi biez mytnaha afarmleńnia.
Papraŭki ŭ KaAP praduhledžvajuć mahčymaść prymianieńnia ŭ dačynieńni da jurydyčnych asobaŭ takoha vidu administracyjnaha spahnańnia, jak papiaredžańnie.
Akramia taho, zakonaprajekt vyznačaje administracyjnuju adkaznaść dla jurydyčnych asob i indyvidualnych pradprymalnikaŭ, jakija arhanizujuć praviadzieńnie dyskatek i pracu načnych kłubaŭ, za źjaŭleńnie tam asobaŭ, jakija nie dasiahnuli 18 hadoŭ.
