Minuły maj dla bolšaści krain Zachodniaj Jeŭropy byŭ samy chałodny za apošnija 50 hadoŭ. U Biełarusi siaredniesutačnaja tempieratura hetaha miesiaca była bolšaja za sinaptyčnuju normu prykładna na 1—4 hradusy. Potym na Jeŭropu rynułasia «chvala» mahutnych daždžoŭ, a ciapier da nas pačynaje ruchacca haračynia z boku Afryki...
Pavodle infarmacyi načalnika słužby mietearałahičnych prahnozaŭ Respublikanskaha hidramietcentra Minpryrody Dźmitryja Rabava, užo siońnia da nas zavitała davoli ciopłaje pavietra z poŭdnia Jeŭropy. Tempieratura pavietra ŭdzień čakajecca ŭ miežach 24—27 hradusaŭ, na poŭdni krainy — da 30—32. U Minsku budzie 27—29, a na poŭnačy Viciebskaj vobłaści — tolki 18—23. Na paŭnočnym zachadzie krainy nievialikija daždžy, miescami navalnicy.
Vyprabavańnie śpiokaj pačniecca ŭ piatnicu-subotu, kali na terytoryju Biełarusi pačnie pastupać haračaje trapičnaje pavietra z boku poŭnačy Afryki. Umovy nadvorja buduć nahadvać sapraŭdnuju paryłku, bo navat unačy budzie 16—23 hradusy, udzień 27—32, a na paŭdniovym uschodzie — ažno da plus 35! U piatnicu nievialikija karotkačasovyja daždžy čakajucca na poŭnačy, a ŭ subotu — na paŭnočnym zachadzie krainy.
Sinoptyki prahnazujuć, što ŭ niadzielu da nas z boku Zachodniaj Jeŭropy padydzie atmaśfierny front, uśled za jakim u Biełaruś zavitaje bolš śviežaje pavietra. Udzień čakajecca ŭžo ŭ miežach 19—26, tolki ŭ Homielskaj vobłaści jašče da 32 hradusaŭ. Unačy jašče budzie davoli ciopła — da 17—24. Atmaśfierny front u niadzielu pryniasie daždžy i navalnicy na ŭsiu terytoryju krainy. U asobnych rajonach buduć mocnyja liŭni, pry navalnicach paryvisty viecier.
U pačatku nastupnaha tydnia śviežaje nadvorje raspaŭsiudzicca ŭžo na ŭsiu terytoryju krainy. Dniom — 16—23. Dźmitryj Rabaŭ adznačyŭ, što asobnyja suśvietnyja ekśpierty prahnazujuć sioleta Jeŭropie samaje śpiakotnaje leta za apošnija 150 hadoŭ. Adnak spadar Rabaŭ udakładniŭ, što takija doŭhaterminovaja sinaptyčnyja prahnozy cełaha kantynienta apraŭdvajucca zvyčajna tolki na 55—60 pracentaŭ.
Nahadaju, što biełaruski prahnoz na červień zapłanavaŭ siaredniamiesiačnuju tempieraturu, na adzin hradus vyšejšuju za normu. Zvyčajna samym śpiakotnym u nas byvaje lipień. Zhodna z papiarednimi prahnozami, tempieraturny fon druhoha miesiaca leta stanie na 1—2 hradusy vyšejšym za normu, jakaja składaje 17—19 hradusaŭ.
Što datyčycca trapičnaj śpiakoty ŭ piatnicu i subotu, to ŭ hetyja dni sinoptyki čakajuć abnaŭleńnia tempieraturnych rekordaŭ, bo prahnazavanaja tempieratura budzie prykładna na 8—13 hradusaŭ vyšejšaj za normu.
Anamalnyja sinaptyčnyja źjavy hetymi dniami «naradzili» mocnuju pavodku ŭ asobnych krainach Jeŭropy. Biełaruś padobnaja «navała» pakul abychodzić bokam. Dźmitryj Rabaŭ upeŭnieny, što ŭ najbližejšyja 2—3 hady nijakaj pavodki ŭ našaj krainie nie budzie. Na rekach skłałasia spakojnaje hidrałahičnaje stanovišča. Nie prahnazujecca ŭ hety čas i zasuchi. Paśla 3 dzion śpiakoty — abaviazkova niekalki dzion daždžoŭ. Padobnyja čarhavańni roznych umoŭ nadvorja buduć u červieni nie redkaściu, ličać u Biełhidramietcentry.
