Paśla zabojstva milicyjanieram dziaŭčyny ŭ Rahačoŭskim rajonie bolš za tryccać supracoŭnikaŭ i kiraŭnikoŭ sistemy MUS pryciahnuty da dyscyplinarnaj adkaznaści — ad vymoŭ da zvalnieńnia. Pra heta BiełaPAN paviedamiŭ Juryj Dziamjančyk — načalnik śledčaha adździeła pa najvažniejšych spravach prakuratury Homielskaj vobłaści, jaki zajmajecca rasśledavańniem kryminalnaj spravy ŭ dačynieńni da ŭčastkovaha milicyjaniera.

Pavodle słoŭ Dziamjančyka, słužbovaja pravierka, praviedzienaja ŭpraŭleńniem ułasnaj biaśpieki MUS, pakazała, što pryčyny ŭčynieńnia złačynstva — nie tolki asabistyja nizkija maralnyja jakaści milicyjaniera, ale i praktyčna poŭnaja adsutnaść kantrolu z boku kiraŭnictva Rahačoŭskaha RAUS i Homielskaha UUS. Indyvidualna-vychavaŭčaja raboty ŭ RAUS, adznačyŭ jon, pravodziłasia farmalna.

Na momant praviadzieńnia pravierki ŭ Rahačoŭskim RAUS adzin supracoŭnik milicyi byŭ u stanie ałkaholnaha apjanieńnia — potym jon byŭ zvolnieny, druhi — niekalki hadzin adsutničaŭ na pracoŭnym miescy biez pavažlivaj pryčyny, jaho panizili na pasadzie.

Za hrubaje parušeńnie dyscypliny z šerahaŭ milicyi zvolnieny abvinavačvany va ŭčynieńni zamachu na zabojstva dziaŭčyny 30-hadovy ŭčastkovy, jaki pracavaŭ u orhanach z 1996 hoda, i troje jaho kaleh, jakija znachodzilisia na miescy ŭčynieńnia złačynstva. Adzin z prysutnych na miescy NZ milicyjanier źnik, ale praz dva dni jaho miescaznachodžańnie było ŭstanoŭlenaje.

Jašče troje supracoŭnikaŭ Rahačoŭskaha RAUS, adkaznyja za achovu hramadskaha paradku, pryciahnuty da dyscyplinarnaj adkaznaści. Dva supracoŭniki RAUS atrymali strohuju vymovu, adzin — vymovu, jašče adzin — panižany na pasadzie.

Načalniki štaba RAUS i ekśpiertna-kryminalistyčnaj słužby atrymali pa strohaj vymovie. Siem kirujučych rabotnikaŭ RAUS — namieśniki načalnika i načalniki strukturnych padraździaleńniaŭ — pa strohaj vymovie za nienaležnaje vykanańnie słužbovych abaviazkaŭ. Načalnik RAUS panižany na pasadzie.

Strohija vymovy taksama vyniesieny siami kiraŭnikam upraŭleńniaŭ UUS Homielskaha abłvykankama, abjaŭlena vymova i načalniku UUS.

Pakarany vymovaj try kiraŭniki ŭpraŭleńniaŭ MUS, adkaznyja za achovu hramadskaha paradku, prafiłaktyku, kadry i śledstva

Nahadajem, trahiedyja adbyłasia pozna ŭviečary 6 lipienia. Učastkovy milicyjanier Rahačoŭskaha RAUS, znachodziačysia ŭ słužbovaj mašynie, vystraliŭ z tabielnaha pistaleta ŭ 22-hadovuju dziaŭčynu, žycharku vioski Žuravičy Rahačoŭskaha rajona. Jana atrymała ślapoje ahniastrelnaje ranieńnie hałavy i pamierła praz 10 dzion u balnicy, nie prychodziačy ŭ prytomnaść.

Ustanoŭlena, što milicyjanier na momant učynieńnia złačynstva byŭ pjany — u jaho kryvi było kala 1,8 pramile ałkaholu.

U kryvi jaho kalehi-učastkovaha, jaki taksama znachodziŭsia na miescy NZ, było 2,0 pramile ałkaholu. Treci ŭdzielnik kampanii milicyjanieraŭ źbieh, tamu jaho nie ahledzieli. Vadziciel-milicyjanier byŭ ćviarozy, ale jon nie prainfarmavaŭ kiraŭnictva ab tym, što jaho kalehi pjanstvujuć, a nie achoŭvajuć hramadski paradak.

Homielskaja abłasnaja prakuratura raspačała spravu pa č. 1 art. 14, 139 Kryminalnaha kodeksa (zamach na zabojstva). Nie vyklučana, što kančatkovaje abvinavačańnie budzie pradjaŭlena jak zabojstva.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?