Biełaruś płanuje ŭ žniŭni raźmiaščeńnie jeŭrabondaŭ na rasijskim rynku, paviedamiŭ kiraŭnik Nacyjanalnaha banka Piotr Prakapovič na pres-kanfierencyi ŭ Minsku 29 lipienia.

«Pryniata rašeńnie, što ŭ chutkim časie, mahčyma ŭ žniŭni, adbudziecca raźmiaščeńnie jeŭrabondaŭ na rasijskim rynku. Kab hety rynak taksama byŭ dla nas adkryty, była svaja kredytnaja historyja i vopyt pracy z rasijskim rublom», — rastłumačyŭ jon.

Jak miarkuje Prakapovič, heta nie buduć «značnyja sumy» — prykładna 100–200 młn. dołaraŭ u ekvivalencie. «Heta budzie probnaje raźmiaščeńnie. Nam treba prazandavać staŭleńnie rasijskaha rynku da našych kaštoŭnych papier», — zaznačyŭ jon.

Kiraŭnik Nacbanka zajaviŭ, što da kanca 2010 hoda ci ŭ pačatku 2011-ha Biełaruś vyjdzie na azijacki rynak kaštoŭnych papier.

«Azijacki rynak źjaŭlajecca adnym z najbolš efiektyŭnych,
u tym liku pa košcie raźmiaščeńnia kaštoŭnych papier, pa ich kolkaści. Heta jomisty rynak, i nam treba jaho asvojvać», — skazaŭ Prakapovič.

«Tym samym my stvorym efiektyŭny instrumient dla pryciahnieńnia źniešnich pazyk na mižnarodnym finansavym rynku», — dadaŭ jon.

Kamientujučy niadaŭniaje debiutnaje raźmiaščeńnie jeŭrabondaŭ na 600 młn. dołaraŭ pad staŭku 8,75%, kiraŭnik Nacbanka padkreśliŭ, što pieršyj probny krok byŭ paśpiachovym. «My raźmiaścili niaznačnuju sumu. Pry zajaŭlenym abjomie 600 młn. dołaraŭ inviestary zajavili bolš za 1,6 młrd. dołaraŭ. Heta havoryć ab tym, što pieršaje raźmiaščeńnie akazałasia ŭdałym», — skazaŭ jon.

Havoračy pra vysokuju pracentnuju staŭku — 8,75%, Prakapovič adznačyŭ, što «takaja situacyja skłałasia na rynku».

«Da taho ž, heta naša pieršaje raźmiaščeńnie jeŭrabondaŭ, — skazaŭ kiraŭnik Nacbanka i nahadaŭ: — Siońnia ŭ nas pakul niama kredytnaj historyi, nas nichto nie viedaje».

«Nastupnyja raźmiaščeńni jeŭrabondaŭ z ulikam nazapašanaha vopytu ŭ inviestaraŭ, našaj kredytnaj historyi buduć ažyćciaŭlacca pa bolš nizkich staŭkach», — kanstatavaŭ Prakapovič.

Nahadajem, ukaz prezidenta ad 13 maja 2010 hoda daje ŭradu prava vypuścić u 2010–2011 hadach ablihacyi na sumu da 2 młrd. dołaraŭ z terminam abaračeńnia nie mienš jak piać hadoŭ i raźmiaščeńniem za miežami Biełarusi. Ukaz pryniaty z metaj pryciahnieńnia zamiežnych inviestycyj u biełaruskuju ekanomiku.

***

26 lipienia stała viadoma, što mižnarodnaje rejtynhavaje ahienctva Standard & Poor`s (S&P) prysvoiła debiutnamu zapłanavanamu vypusku biełaruskich ablihacyj papiaredni doŭhaterminovy rejtynh pryjarytetnaha niezabiaśpiečanaha doŭhu «V+».

Ahienctva S&P taksama prysvoiła zapłanavanamu vypusku rejtynh adnaŭleńnia «4». Hety ŭzrovień rejtynhu aznačaje, što ahienctva aceńvaje vierahodnaść adnaŭleńnia emitenta ŭ vypadku defołtu pa ablihacyjach u 30–50%.

«Značeńni rejtynhaŭ Biełarusi prysvojeny ŭ suviazi z našaj acenkaj pakazčykaŭ likvidnaści, jakija słabyja i paharšajucca, vysokich značeńniaŭ deficytu biahučaha bałansu i pastajannych prablem va ŭzhadnieńni cen enierhanośbitaŭ, što impartujucca z Rasii», — havorycca ŭ paviedamleńni ahienctva.

Rejtynh «B» aznačaje «bolš vysokuju ŭraźlivaść pry najaŭnaści niespryjalnych kamiercyjnych, finansavych i ekanamičnych umoŭ, adnak u zaraz jość mahčymaść vykanańnia daŭhavych abaviazacielstvaŭ u termin i ŭ poŭnym ab`iomie». Znak «plus» ci «minus» abaznačajuć pramiežkavyja rejtynhavyja katehoryi u adnosinach da asnoŭnych katehoryj.

Jeŭrabondy (jeŭraablihacyi) — raznavidnaść doŭhaterminovych kaštoŭnych papier. Heta daŭhavyja abaviazacielstvy, jakija cyrkulujuć na rynku jeŭravalut. Pazyčalnikami, jakija vypuskajuć jeŭrabondy, vystupajuć urady, karparacyi, mižnarodnyja arhanizacyi, zacikaŭlenyja ŭ atrymańni hrašovych srodkaŭ na praciahły termin (ad 7 da 40 hadoŭ). Raźmiaščajucca jeŭrabondy inviestycyjnymi i kamiercyjnymi bankami. Jany ź`iaŭlajucca adnym z najbolš nadziejnych finansavych instrumientaŭ. Tamu asnoŭnyja ich pakupniki — instytucyjanalnyja inviestary: strachavyja i piensijnyja fondy, inviestycyjnyja kampanii.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?