Vykładčyk matematyčnaha fakulteta Homielskaha dziaržaŭnaha univiersiteta imia Francyska Skaryny zatrymany i aryštavany pa padazreńni ŭ atrymańni chabaru ad studentaŭ. U dačynieńni da jaho raspačata sprava na padstavie art. 430 Kryminalnaha kodeksa (atrymańnie chabaru).
Zatrymańnie pravodzili supracoŭniki ŭpraŭleńnia pa baraćbie z ekanamičnymi złačynstvami UUS, rasśledavańniem zajmajecca prakuratura Homielskaj vobłaści. Ab akaličnaściach kryminalnaj spravy paviedamiŭ načalnik śledčaha adździeła pa najvažniejšych spravach prakuratury Homielskaj vobłaści Juryj Dziamjančyk.
Pavodle jaho słoŭ, vykładčyk pracavaŭ na kafiedry ekanamičnaj kibiernietyki i teoryi vierahodnaści. Jon ustanaŭlivaŭ suviazi z adnym sa studentaŭ hrupy i prasiŭ jaho daviedacca, chto baicca zdavać zalik abo sumniavajecca ŭ svaich viedach. Student składaŭ śpis tych, chto byŭ nie ŭpeŭnieny ŭ svaich viedach i chacieŭ harantavana zdać zalik. Hrupu takich studentaŭ vykładčyk raźbivaŭ na padhrupy.
Kožnaj padhrupie jon davaŭ piśmovaje zadańnie z ukazańniem, što jamu treba i ŭ jakim mahazinie, za jakuju canu hetuju reč treba kupić.
Da prykładu, vykładčyku pryhlanuŭsia padnos «z rośpisam čyrvonymi ružami» koštam 170 tys. rubloŭ, jaki jon padrabiazna apisaŭ u zapiscy, ukazaŭšy adras mahazina i canu. U inšym mahazinie jamu spadabałasia «inkrustavanaja škatułačka». Atrymaŭšy takija zapiski z padrabiaznymi instrukcyjami, studenty vykonvali zadańnie i atrymlivali zalik.
Na śledstvie zatrymany patłumačyŭ, što źjaŭlajecca amataram mastactva i daŭniny, ale za svaje srodki nie moh kupić upadabanyja rečy, tamu chabar sa studentaŭ jon nazvaŭ «vymušanym krokam». Tak, pavodle słoŭ vykładčyka, jon dva hady chadziŭ mima vitryny mahazina i maryŭ stać uładalnikam zhadanaha raśpisnoha padnosa.
Vykładčyk aryštavany, viadziecca śledstva.
