Kamitetam dziaržbiaśpieki aryštavany hałoŭny śledčy KDK Dźmitryj Adamovič. Amal adnačasova ad zajmanaj pasady adchileny pamočnik staršyni KDK Viktar Pisaryk.

Paśla pravierki Departamienta finansavych rasśledavańniaŭ KDK, praviedzienaj Savietam biaśpieki, dziaržkantrol bolš za miesiac znachodziŭsia ŭ čakańni poŭnaha razhromu svaich pazicyj. I voś hrom hrymnuŭ.

 Dźmitryj Adamovič. Fota bymedia.net

Dźmitryj Adamovič. Fota bymedia.net

Jak pisali krynicy, blizkija da KDB, padčas pravierki byli vyjaŭlenyja schiemy, pa jakich biznesoŭcy ŭnikali kryminalnaha pieraśledu. Pryčym centralnaj fihuraj pa mnohich epizodach takich schiem nibyta prachodziŭ mienavita aryštavany ciapier načalnik Upraŭleńnia pa rasśledavańni złačynstvaŭ DFR KDK.

Schiemy pracavali dastatkova prosta i całkam zakonna: rasśledavańnie kryminalnaj spravy prypyniałasia na jakoj-niebudź dobraprystojnaj padstavie (naprykład, u suviazi z vyšukam padazravanych, jakija nikudy nie chavalisia), a potym pra jaho zabyvalisia na 5, 6 abo 9 hadoŭ, pakul nie zakančvaŭsia termin pryciahnieńnia da kryminalnaj adkaznaści abo pakul nie adpaviedny artykuł nie vyklučaŭsia z Kryminalnaha kodeksa.

Paśla taho jak pra vyniki pravierki dakłali kiraŭnictvu krainy, pačałasia apieratyŭnaja raspracoŭka orhanaŭ finansavych rasśledavańniaŭ Biełarusi z boku Kamiteta dziaržaŭnaj biaśpieki. Jak miarkuje «Ježiednievnik», jana była skiravanaja suprać daradcy staršyni KDK Viktara Pisaryka, namieśnika dyrektara DFR KDK Viktara Marozava i načalnika Upraŭleńnia rasśledavańnia złačynstvaŭ DFR KDK Dźmitryja Adamoviča.

Pra Pisaryka kažuć, što mienavita jon realna kiruje Kamitetam dziaržkantrolu, choć farmalna źjaŭlajecca ŭsiaho tolki daradcam staršyni.
Pisaryk u svoj čas prałabijavaŭ pryznačeńnie na pasadu namieśnika dyrektara DFR KDK Viktara Marozava, jaki całkam źmianiŭ strukturu śledstva orhanaŭ finansavych rasśledavańniaŭ.

Spačatku terytaryjalnaje śledstva orhanaŭ finansavych rasśledavańniaŭ było vyviedzienaje z-pad niepasrednaha padparadkavańnia centralnaha śledčaha ŭpraŭleńnia DFR KDK, i, kab jašče bolš uzmacnić kantrol nad śledstvam, u departamiencie stvarajecca Upraŭleńnie pracesualnaha nahladu.

Na pasady načalnikaŭ śledčaha i nahladnaha ŭpraŭleńniaŭ Viktar Marozaŭ stavić svaich ludziej — dvuch blizkich siabroŭ, jakich naŭprost padparadkoŭvaje sabie. Pry hetym u śledčym upraŭleńni byŭ stvorany jašče adzin adździeł, jaki padmiaŭ pad siabie ŭsie rasśledavańni finansavych złačynstvaŭ, dzie fihuravali bujnyja sumy. A kiravać adździełam, jak śćviardžaje «Ježiednievnik», Viktar Marozaŭ pryznačyŭ svajho chreśnika. Takim čynam jon zamknuŭ na sabie i śledstva, i kantrol nad im u DFR KDK. U svaju čarhu Viktar Marozaŭ naŭprost zamykaŭsia i znachodziŭsia ŭ blizkich siabroŭskich adnosinach ź Viktaram Pisarykam, jaki zabiaśpiečvaŭ jamu prychilnaść staršyni KDK Zianona Łomacia.

Hetaja schiema była pryniataja ŭ KDB za pracoŭnuju, tamu, kab pačać raspracoŭku «śviatoj trojcy», u pieršuju čarhu była inicyjavanaje adchileńnie ad pasady Viktara Pisaryka.

Pavodle infarmacyi «Ježiednievnika», na minułym tydni čekisty praviali ŭ dačynieńni da DFR KDK supraćkarupcyjnuju apieracyju, jak u samym sapraŭdnym detektyvie.

Spačatku na haračym byŭ zaśpiety pasiarednik u pieradačy bujnoha chabaru słužbovym asobam DFR KDK. Jon daŭ pakazańni suprać načalnika Upraŭleńnia pa rasśledavańni złačynstvaŭ DFR KDK Dźmitryja Adamoviča.

U aŭtorak, 3 žniŭnia, Dźmitryja Adamoviča paprasili pryjechać u KDB — nibyta kab uzhadnić pazicyi pa adnoj sumiesnaj apieratyŭnaj raspracoŭcy. Adamovič tak i skazaŭ padnačalenym, što jedzie ŭ KDB. Bolš jaho nichto nie bačyŭ.

Jak raskazali ŭ Kamitecie dziaržbiaśpieki, pieršapačatkova Adamovič sapraŭdy pajechaŭ da KDB, ale pa darozie niečakana pieradumaŭ. Jon raptam nakiravaŭsia ŭ Hienieralnuju prakuraturu. Ale čekisty pierachapili hałoŭnaha finansavaha śledčaha Biełarusi prosta na hanku budynka prakuratury.

Dźmitryj Adamovič akazaŭ aktyŭny supraciŭ apieratyŭnikam KDB, ale jaho chutka skrucili, zapchnuli ŭ mašynu i źvieźli. Usio heta nazirali sa svaich voknaŭ prakurorskija rabotniki.

U piatnicu čekisty pryjšli da namieśnika hienieralnaha prakurora Mikałaja Kuklisa pa sankcyju na aryšt Adamoviča. Treba mierkavać, zusim nie vypadkova, bo staršynia KDB siońnia sam moža davać takuju sankcyju. Ale čekisty pajšli nie da jaho, a da Kuklisa, tamu što da jaho paśla zatrymańnia hałoŭnaha finansavaha śledčaha Biełarusi try dni chadzili pasłancy ad staroj marozaŭskaj hvardyi DFR KDK. Voś čekisty, napeŭna, i chacieli pahladzieć, jak budzie pavodzicca namieśnik hienieralnaha prakurora. Čekisty prasiedzieli ŭ Kuklisa dźvie hadziny, ale tak i nie atrymali sankcyi na aryšt Adamoviča. Paśla hetaha sankcyju na aryšt daŭ staršynia KDB Vadzim Zajcaŭ.

Ciapier KDB rychtuje dakład dla kiraŭnika dziaržavy, u jakim nie tolki apisvajucca ŭsie hetyja padziei, ale i dajucca acenki dziejnaści jak aryštavanaha Adamoviča, jaho niepasrednaha načalnika Viktara Marozava, inšych ludziej ź ich kamandy, tak i namieśnika hienieralnaha prakurora Mikałaja Kuklisa.

Ani KDB, ani KDK infarmacyi pra spravu nie dajuć.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?