Ja razmaŭlaju z Alaksandraj i Kanstancinam u mienskaj kaviarni. Jany zaŭsiody adkrytyja ŭ razmovie, ale paprasili abminuć palityku i «Eŭrabačańnie». Tym nia mienš, abmiarkoŭvajučy novy dysk i biełaruski šoŭ-biznes, my ŭsio roŭna niaŭchilna natykajemsia na «zabaronienuju» temu.

Historyja duetu padzialajecca na dva peryjady — da Stambułu i paśla. «Nam daviałosia raspłačvacca za čužy nieprafesijanalizm, ale nas heta dobra zahartavała», — kažuć jany. U čas padrychoŭki da festyvalu «AiK» trapili ŭ aŭtaavaryju. Presa tady paviedamiła, što jany nie paciarpieli, adnak u Kości byŭ pierałom troch kaściej, u Sašy — paškodžany tvar. Praź dzień jany ŭžo stajali na zdymačnaj placoŭcy. «Ja pabyvaŭ u skury ŭlubionaha persanaža — Ajvenha», — zhadvaje Kanstancin.

Z taho času, jak hledačy BT prahałasavali za «AiK» na adbory na «Eŭrabačańnie-2004», muzykam pryjšłosia pryvučacca da novaha dla siabie statusu. Zamiest načnych baraŭ Barysava i Miensku ich zaprašali vystupać na VIP-viečaryny (adyhrali na viasielli Maksa Mirnaha) i bujnyja kancerty (sumiesna z Rusłanaj jany hrali ŭ Lvovie pierad sarakatysiačnaj aŭdytoryjaj). Ale paśla projhryšu pačałosia j ckavańnie — pa siońnia raz-poraz u presie kidajuć krytyčnyja streły.

Kab dakazać samim sabie i słuchačam, čaho jany vartyja, «AiK» začynilisia ŭ studyi. Bałazie, Michaił Finbierh, moža, najmacniej padtrymaŭ duet paśla «Eŭrabačańnia». Praca ŭ nacyjanalnym arkiestry nie abmiažoŭvała tvorčaj svabody. Albom, jaki maje pracoŭnuju nazvu «Pa-za abłokami», — plon hodu pošukaŭ.

Pavodle pryznańnia «AiK», jany pajšli na źmianieńnie stylu dziela pašyreńnia aŭdytoryi: ad intymnych kamernych tvoraŭ siahnuli ŭ etna-fjužn — bolš tancavalny kirunak. «Nia chočam być šyrokaviadomymi ŭ vuzkich kołach». Sama duša prasiła ŭskładnieńnia aranžyrovak, bolš jarkaj palitry».

Akramia biełaruska- i anhielskamoŭnych piesień, u albomie jość i pieśnia pa-litoŭsku — «Antylopa», ź jakoj duet staŭ laŭreatam na festyvali «Palangos gaida 2005». Ale baza — biełaruskaja etnika — zastałasia. «Navat u anhielskamoŭnych pieśniach my zachoŭvajem biełaruski pačatak. U projhryšy «Stairs of Separation» čuvać melodyja «Lavonichi», a ŭ «Money & The Mountains» hučyć akaryna — padarunak našaj mahiloŭskaj prychilnicy». Toj fakt, što «AiK» adzinyja sioleta źniali klip na biełaruskuju pieśniu, havoryć sam za siabie.

Alaksandra i Kanstancin piajuć razam ad 1998. Datul Kanstancin ihraŭ u hurcie «SamGrey», a Alaksandra skončyła muzyčnuju škołu pa klasie fartepijana. Jana pieramožca konkursu «Zornaja rostań». Vydańnie albomu «Za lichimi za marozami» padtrymaŭ BiełAZ. U arkiestry Finbierha ad 2002. Reliz albomu «Pa-za abłokami» zaplanavany na studzień.

Клас
0
Панылы сорам
0
Ха-ха
0
Ого
0
Сумна
0
Абуральна
0