Jon mianiaje styli jak palčatki, jaho imia — ustojlivy brend. Jon vydatna viedaje, što pradaje: ramantyčnaść, piaščotu i śpiełuju seksualnaść. Chilicca da stałaj aŭdytoryi, jakaja ŭ kursie ŭsich ludskich pieražyvańniaŭ, ale dla duetaŭ zaprašaje maładych repieraŭ i śpievakoŭ.
Usio heta Stynh, pamiarkoŭny ryzykant.
Šaviec z botami
Tak, Stynh — basist, jaki redka hraje na basie, i rokier, jaki redka hraje rok. Paśla roskvitu hurta Police ŭ 1984m Stynh źviarnuŭsia da solnaj karjery. Kinuŭ hulacca ŭ navatara i staŭ ihrać na sutyku stylaŭ: džazu, šansonu i etničnaj papsy. Rokiery «pavažali dziadźku» za pieśniu Roxanne, amatary ž popu praniklisia naskroź liryčnym Shape of My Heart / «Abrys majho serca».
Stynh adčuvaje čas: hetak, u 1985 hodzie jon uraziŭ usich pieśniaj ź pieršaha, płacinavaha, alboma Dream of the Blue Turtles, Russians/«Rasijcy». Psieŭdasimfaničny saŭnd z papularnymi na toj čas ukrapleńniami z savieckich radyjoefiraŭ. U tekście ž, užo nie nadta mudrujučy, Stynh vyjaviŭ strach siaredniaha zachodniejeŭrapiejca pierad jadziernym udaram i vykazaŭ usieahulnaje spadziavańnie, što «savieckija ludzi taksama lubiać svaich dzietak».
A jašče pieśnia They Dance Alone/«Jany tančać adny», napisanaja Stynham u pamiać ab achviarach čylijskich represijaŭ.
I na dudzie ihrec
Paśla Stynh źniaŭsia ŭ błokbastary. «Karty, hrošy, dźvie ruli» prynieśli Haju Ryčy słavu kinapadryŭnika. Stynh zaśviaciŭsia ŭ filmie niekalki chvilin, ale na ŭsich afišach pisaŭsia ŭporavień z paŭviadomymi akciorami. Publika išła na Stynha, a atrymlivała fajny film (biez Stynha).
Stynh viedaje formułu pośpiechu, ale nie zaŭsiody pilnujecca jaje. Nu, navošta jon palez u 2007 hodzie śpiavać pierad uźbiekskim dyktaram Isłamam Karymavym? U jakaści procivahi varta zaznačyć, što ciaham tryccaci hadoŭ Stynh dapamahaŭ pravaabarončaj arhanizacyi Amnesty International i ŭłasnymi funtami ratavaŭ trapičnyja nierušy Brazilii.
Vynik nieŭtajmavanych błukańniaŭ Stynha: muzyčnaja nasyčanaść sa stylistyčnymi damieškami z usich kutkoŭ śvietu i čaściakom nietryvijalnyja teksty piesień. Pošuk časam niaŭdały, ale publika zaŭsiody moža acanić sam fakt pošuku. Publika prychodzić na jaho kancert, jak na alimpijskija spabornictvy, kab ubačyć, u jakuju siońnia pozu pastavić Stynh hetyja niaščasnyja siem not i jakija ekzatyčnyja instrumienty i padpiavały jamu dapamohuć u hetym.
20 vieraśnia Stynh budzie pieršym, chto vyprabuje travu na poznanskim stadyjonie pierad Čempijanatam Jeŭropy pa futbole, jaki adbudziecca ŭ Polščy i Ukrainie ŭ 2010m. Dva dni da hetaha na pradmiet prafprydatnaści jon pratestuje budučuju haspadyniu Čempijanatu pa chakiei — 2014, «MinskArenu».
***
18 vieraśnia. «Minsk-Arena» (pr.Pieramožcaŭ, 111). Stynh (Hordan Samnier) u supravadžeńni karaleŭskaha fiłarmaničnaha arkiestra. z prahramaj «Simfonisici» i najlepšymi pieśniami.
Pačatak a 20-j.
Kvitki ad 120 000 da 1 500 000.
