Homielski kaardynatar stvaranaj partyi «Biełaruskaja chryścijanskaja demakratyja» Kastuś Žukoŭski, jakoha ŭčora na etnakulturnym feście «Poklič Paleśsia» ŭ vioscy Laskavičy Pietrykaŭskaha rajonu zatrymała milicyja, apynuŭsia ŭ rajonnym špitali.
Kastuś Žukoŭski.
Lekary kanstatavali ŭ Žukoŭskaha «strasieńnie mazhoŭ». Na hałavie ŭ jaho siniaki. Pavodle lekaraŭ, Žukoŭski budzie znachodzicca ŭ špitali 7-10 dzion.
Kastuś Žukoŭski jašče da špitalu apavioŭ, što jaho zatrymali milicyjanty i zaviali ŭ adździaleńnie milicyi. Kapitan Marozienka i major Navumik spačatku kazali, što jon nieachajna apranuty, paśla — što ŭ Kastusia nibyta padrobleny pašpart, potym — što jon nibyta padobny na niejkaha złodzieja».
Praź niejki čas spadara Žukoŭskaha adpuścili. Jon pajšoŭ šukać staršyniu Homielskaj maładziova-kulturnickaj supołki «Tałaka» Łarysu Ščyrakovu — jana pryjechała ŭ Laskavičy razam z Kastusiom na jahonym aŭtamabili, kab źniać na videa paleskich zachavalnikaŭ narodnych tradycyjaŭ.
Žukoŭski na miesca sustrečy nia trapiŭ. Na jaho nalacieli niejkija achoŭniki — aktyvist kaža, što z achovy premjer-ministra, — pavalili na ziamlu, załamali ruki.
Łarysa Ščyrakova: «Kastuś patelefanavaŭ mnie na mabilny i skazaŭ, što jon znachodzicca ŭ milicejskaj mašynie. Ja znajšła jaho — jon sapraŭdy siadzieŭ u mašynie. Skazaŭ, što jaho viazuć u Pietrykaŭ „na sutki“. Addaŭ mnie klučy ad mašyny — i bolš ja jaho nia bačyła».
U Pietrykaŭskim RAUS paviedamili, što suprać Žukoŭskaha składzieny pratakoł za drobnaje chulihanctva. Ale za kraty jaho nie adpraŭlali — jon skardziŭsia na hałaŭny bol, i jaho advieźli ŭ špital. Chto j dzie davioŭ jaho da «strasieńnia mazhoŭ», dakładna pakul nieviadoma.
Aŭtamabil «Tajota» Kastusia Žukoŭskaha znachodzicca zaraz u Žytkavičach na štrafnoj stajancy — jaho adahnali tudy «daišniki».
Łaryła Ščyrakova, majučy klučy, chacieła pierahnać «Tajotu» Kastusiu. Adnak jaje zatrymali supracoŭniki DAI — pry sabie jana nia mieła paśviedčańnia kiroŭcy. Da taho ž, nibyta nie spyniłasia na patrabavańnie patrulnaha.
Suprać Ščyrakovaj skłali dva administracyjnyja pratakoły — za kiravańnie aŭtamabilem biez adpaviednaha paśviedčańnia j niepadparadkavańnie supracoŭniku DAI. Supracoŭniki DAI i ludzi ŭ cyvilnym abšukali mašynu.
