Kali z boku kandydataŭ u prezidenty Biełarusi buduć praciahvacca zakliki da niesankcyjanavanych akcyj, «pravaachoŭnyja orhany prymuć miery reahavańnia»,
zajaviŭ 25 listapada načalnik upraŭleńnia Hienprakuratury pa nahladu za vykanańniem zakanadaŭstva i zakonnaściu pravavych aktaŭ Pavieł Radyjonaŭ.
Pavodle jaho słoŭ, dziejnaje ŭ Minsku zakanadaŭstva «libieralnaje»: dla praviadzieńnia akcyi kandydatu ŭ prezidenty nieabchodna tolki za dva dni paviedamić ab svaich namierach u Minharvykankam.
Pradstaŭnik Hienprakuratury nahadaŭ, što pravodzić masavyja mierapryjemstvy zabaroniena na Kastryčnickaj płoščy, płoščach Niezaležnaści, Pieramohi i Jakuba Kołasa, u padziemnych pierachodach, u mietro i na niekatorych inšych abjektach.
Hetaja zabarona, padkreśliŭ Radyjonaŭ, adnosicca nie tolki da 24 listapada, ale i da 19 śniežnia.
Pradstaŭnik Hienprakuratury paviedamiŭ, što ŭ Centrvybarkam nakiravanyja kopii papiaredžańniaŭ ab niedapuščalnaści parušeńnia zakanadaŭstva, vyniesienych kandydatam u prezidenty Mikałaju Statkieviču i Vitalu Rymašeŭskamu.
Papiaredžańni, nahadajem, vyniesienyja za zakliki da hramadzian uziać udzieł u niesankcyjanavanaj akcyi na Kastryčnickaj płoščy 24 listapada ŭ Minsku, jakija prahučali padčas televystupleńniaŭ Rymašeŭskaha i Statkieviča ŭ teleefiry.
«Ciapier Centrvybarkam vyvučyć usie abstaviny i moža pryniać rašeńnie ab pryciahnieńni Statkieviča i Rymašeŭskaha da adkaznaści», — skazaŭ Radyjonaŭ.
Jon uchiliŭsia ad adkazu na pytańnie, ci možna ličyć udzielnikam niesankcyjanavanaj masavaj akcyi kandydata ŭ prezidenty Uładzimira Niaklajeva, jaki taksama prysutničaŭ na Kastryčnikaj płoščy viečaram 24 listapada. Hienprakuratura, zajaviŭ Radyjonaŭ, najpierš daje acenku dziejańniam arhanizataraŭ akcyi.
Radyjonaŭ taksama nie zmoh adkazać na pytańnie, čamu Statkievič i Rymašeŭski nie pryciahnutyja da administracyjnaj adkaznaści za arhanizacyju niesankcyjanavanaha mierapryjemstva. Jon nie vyklučyŭ, što na heta paŭpłyvaŭ ich ciapierašni status kandydataŭ u prezidenty.
Jak paviedamlałasia raniej, pytańnie ab udziele kandydataŭ u prezidenty Vitala Rymašeŭskaha i Mikałaja Statkieviča ŭ niesankcyjanavanaj vuličnaj akcyi CVK razhledzić 30 listapada.
U adpaviednaści z vybarčym zakanadaŭstvam u dačynieńni da kandydataŭ u prezidenty CVK moža vynieści papiaredžańnie abo pryniać rašeńnie ab admienie ich rehistracyi.
