Ministr kultury Biełarusi paabiacaŭ va ŭsich susiednich krainach pastavić pomniki viadomym biełarusam.

Pavieł Łatuška adkazaŭ na pytańni «haračaj linii» ŭ redakcyi haziety «Kultura».

Budziem dapamahać dyjaspary finansava

«Dapamoha biełarusam zamiežža budzie ŭzmacniacca — heta pazicyja kiraŭnika našaj krainy, urada Biełarusi. Ministerstva kultury prystupiła da raspracoŭki Dziaržaŭnaj prahramy «Biełarusy ŭ śviecie». Spadziajomsia, dadzienaja raspracoŭka vynikova skončycca ŭ pieršaj pałovie 2011 hoda, i my budziem mieć sistemu arhanizacyjnaj, materyjalnaj, finansavaj dapamohi i supracoŭnictva ź biełarusami zamiežža».

Zachodnim stalicam — pa biełaruskim kulturnym centry

«Na siońnia va ŭradzie znachodzicca na razhladzie prajekt Dziaržaŭnaj prahramy «Kultura Biełarusi na 2011—2015 hh.». U joj my praduhledžvajem adkryćcio na praciahu piaci hadoŭ, u dadatak da najaŭnaha Kulturnaha centra Biełarusi ŭ Polščy, anałahičnych struktur u Maskvie, Bierlinie, Prazie i Vilni».

Uvaha ŭ prajekcie dziaržprahramy, pa słovach ministra, taksama źviartajecca na prysutnaść kultury ŭ internecie. «My śpiecyjalna zakłali nakirunak finansavańnia stvareńnia ŭ bližejšyja piać hadoŭ internet-resursaŭ, jakija buduć pradstaŭlać infarmacyju pra našu kulturu».

Pomnik Karatkieviču ŭ Kijevie pastaviać da 20 śniežnia

«Litaralna ŭ paniadziełak [29 listapada] padpisaŭ damovu z meram Kijeva ab pieradačy pomnika kłasiku našaha słova va ŭkrainskuju stalicu i ŭstalavańni jaho tam da 20 śniežnia. Nu, a paźniej my budziem damaŭlacca ab uračystaj cyrymonii adkryćcia».

A nakont pomnika piśmieńniku ŭ Minsku jon adkazaŭ, «što heta pytańnie bolš dalokaj pierśpiektyvy, ale vartaje razhladu i realizacyi». «Bližejšymi hadami my płanujem ustalavać va ŭsich stalicach krain-susiedak pomniki, źviazanyja z majstrami našaj litaratury, dziejačami kultury i historyi. My viadziom pieramovy praz naša pasolstva ŭ Vilni, kab, akramia adkrytaj doški Francišku Bahuševiču, u litoŭskaj stalicy źjaviŭsia pomnik Francysku Skarynu».

Moža źjavicca kulturna-spartyŭny telekanał

«Ciapier idzie papiaredniaje abmierkavańnie mahčymaści stvareńnia kulturna-spartyŭnaha telekanała. Razumieju, što chtości padobnym simbijozam budzie niezadavoleny, ale dziaržava ŭsio ž nie moža zatracić na stvareńnie vuzkaśpiecyjalnych telekanałaŭ pa sporcie i kultury miljony dalaraŭ, a potym vydatkoŭvać jašče miljony, kab ich padtrymlivać. Ale važna, što my ŭžo havorym ab samoj mahčymaści stvareńnia takoha važnaha dla biełarusaŭ kanała».

Zakranuli i pytańnie restaŭracyi pomnikaŭ architektury. «Na hety hod my prafinansujem ź Dziaržinviestprahramy kala 80-90 miljardaŭ rubloŭ mienavita na adnaŭleńnie pomnikaŭ. Ale niemahčyma čakać, što ciaham hoda abo navat dziesiaci my adnovim usio». I paskardziŭsia na Minekanomiki, jakoje nie ŭklučyła Ružanski pałac u Dziaržaŭnuju inviestycyjnuju prahrumu. «Prapanova nie była padtrymana. Naša chadajnictva pa inviestycyjnaj prahramie na nastupny hod pieravysiła tyja srodki, jakija pradstaŭleny Ministerstvu kultury, u šeść razoŭ. Prosta nierealna achapić amal adnačasova ŭsie abjekty śfiery kultury. Ale budziem paŭtorna ŭnosić abjekt na 2012 hod».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?