U redakcyi «Komsomolskaj pravdy v Biełarusi» ŭ piatnicu adbyvalisia sustrečy kandydataŭ u prezidenty ź biełaruskimi žurnalistami, jak dziaržaŭnymi, tak i niedziaržaŭnymi. Pradstaŭniki presy naładzili dopyt pretendentam na pasadu prezidenta. Pieršym boj, jak i na telebačańni, trymaŭ sustaršynia Biełaruskaj chryścijanskaj demakratyi Vital Rymašeŭski.

Pra siabie i Sieviarynca

Najpierš u Vitala pacikavilisia, ci nie jość jon pradstaŭnikom na vybarach Paŭła Sieviarynca. «Ludzi mohuć mieć roznyja mierkavańni. BCHD adzinaja jak partyja, jak kamanda. Ja rablu toje, što pavinien rabić. Ja pierakanany, što źmianić situacyju ŭ krainie mohuć tolki mocnyja ruchi. Asabista ja pracuju na Biełaruś, na chryścijanskuju demakratyju, ale nie na kahości inšaha. I Pavieł Sieviaryniec robić toje ž samaje».

Pra byłyja arhanizacyi

«Bolšaść arhanizacyj, što jość u majoj bijahrafii, ja stvaraŭ sam. Što datyčyć partyj, to ja byŭ siabram tolki adnoj (AHP — zaŭvaha «NN»). Ja byŭ adnym z stvaralnikam «Maładoha frontu»

Pra administracyjnuju reformu

«Siońniašniaje administracyjnaje dzialeńnie Biełarusi absalutna nieefiektyŭnaje. Jano pieraškadžaje raźvićcio małych haradoŭ. Heta vidavočna. Niekali z Paźniaka śmiajalisia nakont idei Bałta‑Čarnamorskaha kalektara, a siońnia Łukašenka jaje ździajśniaje. Adna ź biedaŭ biełarusaŭ, što im chapaje ambicyj. Tamu naŭrad ci ja kuplu niekaha z žycharoŭ rajcentra. Budzie bolš efiektyŭnaja sistema ŭpraŭleńnia. Šmat hublajecca praz heta hrošaj. Minsk užo pieraros siabie. I minčanie, i rehijony pakutujuć, što jon tak razrośsia».

Pra Rasiju

«U palitycy važna nie padmanvać. Prablema ŭ stasunkach Biełarusi i Rasii ŭ asabistym niepryniaćci Pucinynym i Miadźviedzievym Łukašenki. Z rasijskimi lidarami treba razmaŭlać prahmatyčna. Nohi vycirać ab siabie nie dazvolim. Ja nie budu pryznavać Abchazii i Paŭdniovuju Asiecii, ale ja i abiacać nie budu. Takim čynam stasunki buduć palepšanyja».

Pra chamstva

Žurnalist ANT Alaksiej Michalčanka nazvaŭ Rymašeŭskaha na ty. Palityka heta aburyła. Heta była reakcyjaj Michalčanki na akcyju: «Saša, sychodź».

«Akcyju ładziła nie tolki BCHD. Ja 24 listapada sustrakaŭsia z vybarcami. Vy možacie ličyć łozunh niekarektnym, ale ja liču, što heta ich prava. Ja šukaju niešta pazityŭnaje va ŭsich ludziej. Navat u supracoŭnikaŭ ANT. Choć za niekatoryja artykuły vy pavinny siadzieć u turmie. Vielmi časta iduć prostyja paklopy. Hetych ludziej možna zrazumieć, ich sadžali ŭ turmu, jak Źmitra Daškieviča. Ja apraŭdaŭ jaho paśla taho, što jon bačyŭ — aryšty, źbićci, adličeńni z univiersitetaŭ. Paśla taho, jak ludziej vyvoziać za horad u maskach, ja b hety łozunh chamstvam nie nazvaŭ».

Pra akcyju 24 listapada

«Paśla akcyi niama rasčaravańnia, a jość natchnieńnie. Ludzi pryšli nasupierak pahrozam. Heta lepšyja ludzi krainy. Jana pakazała, chto jość lidar, chto nie budzie chavacca za śpiny. Heta była mirnaja akcyja. Heta nie ŭvieś resurs. Kali b ja zaklikaŭ padčas druhoha vystupu na płošču, to ludziej było b jašče bolej».

Pra kazino i ałkahol

«Zabaronaj niemahčyma ŭsio vyrašyć. Kali my kažam pra kazino, to nie havorym pra zabaronu, a pra vynas z rysy horadu. Kali kažam pra ałkahol, to pra prahramy baraćby. Niama miažy razbeščanaści. U Jeŭropie niekali była niedazvolenaja prastytucyja, ciapier jana lehalnaja. Zatoje jość prablemy ź piedafilijaj ź inšymi brydkaściami. Niama hłybini, kudy moža ŭpaści čałaviek. My pavinny pakazvać alternatyvu, pakazvać inšyja prykłady. Ładzić śviaty siamji. Nielha pradavać padčas ich ałkahol. Zaraz spojvajecca ŭsio nasielnictva Biełarusi. Prodaž ałkaholnych napojaŭ prynosić vialiki prybytak dziaržavie, a tanny ałkahol — jašče bolšy. Ałkaholu ŭžyvaju niamnoha, ź siabrami, padčas śviataŭ. Lublu vino».

Pra chryścijan

«Prablema ŭ tym, što cerkvy pryvučyli nikudy nie ŭmiešvacca, ni ŭ palityku, ni ŭ što. Maja prahrama — heta pasłańnie chryścijanam: idzicie ŭ palityku. Kožny čałaviek musić adčuvać adkaznaść za krainu. Nijakaha chryścijanskaha cenzu padčas pryjomu na pracu być nie moža. Ale ja liču, čym bolej budzie chryścijan u palitycy, tym budzie lepš. Dla palityka samaje važnaje pavažać ludziej, a prafiesijanałaŭ na pasady možna padabrać».

Pra šlach da pieramohi

«Pieršaja zadača dla nas — pašyreńnie elektaratu i pratestnaj bazy. Pryviadzicie prykład, chto robić bolš hramatna za nas. Nie treba zabyvacca na tyja kaštoŭnaści, dziela čaho my zajmajemsia palitykaj. Kali ja liču niešta pravilna, to heta treba rabić, a nie raźličvać. Ja liču, što moj šlach chutčej pryviadzie mianie da prezidenctva, čym šlach inšych kandydataŭ, jakija sprabujuć być dobrymi dla ŭsich».

Pra aficeraŭ i śpiecsłužby

«Zarobki dla vajskoŭcaŭ ja abiacaju nie mienšyja, čym u śpiecsłužbach. Heta dla ŭmacavańnia vojska. Aficer pavinien šanavacca, heta pavinna być prestyžna. A ciapier heta nie tak. Ludzi nie majuć mahčymaści žyć u narmalnych kvaterach. Naša dziaržava nie turbujecca ab źniešnim vorahu, a šukaje jaho ŭnutry. Ja viedaju, jak pa‑chamsku śpiecsłužby pavodziać siabie ŭ dačynieńni da milicyi. Vojska, milicyja — heta ludzi, što turbujucca pra dabro krainy. Nie sakret, što mnohija śpiecsłužby zajmajucca «kryšavańniem» biźniesu. Faktyčna vykonvajuć rolu kryminalnikaŭ. A praca ich vielmi nieprafiesijnaja».

Pra Alaksieja Šeina

«U Alaksieja chutka narodzicca druhoje dzicia. Jamu treba zabiaśpiečvać svaju siamju. My nie majem takich resursaŭ, kab finansava zabiaśpiečyć ludziej, što pracujuć u štabie. Tym nie mienš, jon dapamahaje ŭ pracy z cerkvami. Davieranymi asobami stali ludzi, što arhanizoŭvajuć sustrečy, jakija pracujuć štodnia i zadarma».

Pra achviaravańni

«Najlepšy kanał — heta telefon, a nie rachunak, praź jaki ŭ biźniesoŭca mohuć być prablemy. Nam vielmi šmat achviaravali. Inakš by nie zmahli pravodzić kampaniju».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?