Aleś Puškin abviaściŭ maŭčanku 9

Mastak, jakoha 9 śniežnia aryštavali na 13 sutak, na znak pratestu admoviŭsia razmaŭlać: jon ani słova nie skazaŭ na sudzie i praciahvaje maŭklivy pratest u kamery papiaredniaha źniavoleńnia.

Alesia Puškina adviedaŭ jahony siabar z Krupak Andrej Alachnovič. Jon pabyvaŭ u Krupskim RAUS, dzie ŭ admysłovym pamiaškańni adbyvajuć «sutki» asudžanyja. Spadar Alachnovič sprabavaŭ pieradać źniavolenamu piečyva, cukierki, harbatu i kavu, adnak Puškin admoviŭsia ad pieradačy.

Pavodle Andreja Alachnoviča, mastak znachodzicca ŭ kamery-adzinočcy i lažyć na narach, adviarnuŭšysia tvaram da ściany i nie reahuje na lubyja zvaroty. Jon z učorašniaha dnia admaŭlajecca ad ježy, kaža spadar Alachnovič, — padobna, što na znak pratestu Puškin abviaściŭ haładoŭku, ale nia kaža pra heta ŭhołas. Taksama na znak pratestu.

Znachodzicca pad aryštam, pavodle rašeńnia Krupskaha rajonnaha sudu, Aleś Puškin musić da 21 śniežnia. Žonka mastaka Janina Puškina pierakanana, što muža aryštavali preventyŭna — kab jon nia zładziŭ niejkaj akcyi ŭ dzień vybaraŭ 19 śniežnia.

***

Padstavaj dla aryštu stała zajava adnaviaskoŭca Łazareviča, jaki paskardziŭsia ŭ milicyju, što mastak jaho źbiŭ. Janina Puškina kaža, što nijakaj bojki nie było: Aleś prosta vystaviŭ niećviarozaha adnaviaskoŭca-kryminalnika sa svajho dvara, kali apošni pačaŭ zadziracca z haspadarom. Incydent adbyŭsia rankam 8 śniežnia, a kala 15.45 Alesia Puškina zabrali ŭ milicyju z ułasnaj chaty ŭ vioscy Bobr Krupskaha rajonu. 9 śniežnia Krupski rajsud asudziŭ Alesia Puškina za złosnaje chulihanstva.

Padčas minułych prezydenckich vybaraŭ mastak taksama znachodziŭsia ŭ źniavoleńni: napiaredadni jaho padobnym čynam hetaksama asudzili za chulihanstva i pakarali aryštam na 15 sutak.

0

0

0

0

0

0

Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH