Žonka eks-kandydata ŭ prezidenty Uładzimira Niaklajeva patrabuje ad hienprakurora Biełarusi Ryhora Vasileviča vyśvietlić i paviedamić joj pra dakładnaje miescaznachodžańnie muža.

Adpaviedny zvarot Volha Niaklajeva nakiravała hienprakuroru i ahučyła 20 śniežnia na pres-kanfierencyi pradstaŭnikoŭ Biuro pa demakratyčnych instytutach i pravach čałavieka (BDIPČ) ABSIE.

Akramia miescaznachodžańnia Niaklajeva, jaho žonka taksama patrabuje ad hienprakurora ŭstanavić miescaznachodžańnie astatnich zatrymanych pretendentaŭ na pasadu prezidenta i inšych udzielnikaŭ akcyi. «U vypadku ich zatrymańnia prašu Vas abaviazać pravaachoŭnyja orhany nieadkładna prainfarmavać svajakoŭ pra miescaznachodžańnie ich rodnych, a taksama paviedamić pra ŭmovy ich utrymańnia», — pracytavała Volha Niaklajeva svoj zvarot.

Jana patrabuje ad hienprakurora pravieści pravierku ŭ suviazi z «najhrubiejšymi parušeńniami zakonnaści ŭ Biełarusi i dać praŭdzivuju pravavuju acenku sistuacyi, u pryvatnaści, padziejam 19 śniežnia ŭ Minsku». «Patrabuju pryniać miery prakurorskaha reahavańnia pa fakcie źbivańnia 19 śniežnia nieviadomymi asobami Uładzimira Niaklajeva, žurnalistaŭ i mirnych hramadzian, a taksama pravieści prakurorskuju pravierku pa abhruntavanaści prymianieńnia hrubaj fizičnaj siły i śpiecsrodkaŭ pry razhonie mirnych hramadzian na płoščy Niezaležnaści», — zajaviła žonka palityka.

Niaklajeva padkreśliła, što joj dahetul nieviadomaje miescaznachodžańnie muža. «Užo prajšli adviedzienyja zakonam 12 hadzin, kali ŭ vypadku, jak jon byŭ zatrymany, pavinny byli prainfarmavać svajakoŭ ci dać jamu mahčymaść ź imi źviazacca», — skazała jana.

Skončyŭšy svajo vystupleńnie pierad žurnalistami, Volha Niaklajeva raspłakałasia.

Jak paviedamiŭ kiraŭnik misii karotkaterminovych naziralnikaŭ ABSIE Toni Łojd, ABSIE dałučajecca da zajavy Volhi Niaklajevaj i patrabuje abjavić miescaznachodžańnie i stan zatrymanych 19 śniežnia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?