Biełaruskija naftapierapracoŭščyki pakul nie mohuć damovicca z rasijskimi pastaŭščykami pra formułu cany na naftu, jakaja budzie pastupać u krainu ŭ 2011 hodzie.
«Biazmytnaja nafta na biełaruskija NPZ pakul nie pastupaje. Iduć pieramovy, u chodzie jakich abmiarkoŭvajucca pytańni cenaŭtvareńnia. Ź biełaruskaha boku ŭ hetych pieramovach udzielničajuć našy NPZ, kancern «Biełnaftachim» i Biełaruskaja naftavaja kampanija, z rasijskaha — naftazdabyŭnyja kampanii, uładalniki resursaŭ», — raskazali ŭ kancernie «Biełnaftachim».
Miž tym udzielniki biełaruskaha naftavaha rynku paviedamili, što padčas pieramovaŭ rasijskija naftavyja kampanii prapanavali zakłaści ŭ formułu koštu biazmytnaj nafty dadatkovyja $45 na 1 tonu. Na ich dumku, heta dazvolić rasijskim pastaŭščykam zabiaśpiečyć roŭnuju prybytkovaść pry pastaŭkach nafty pa ŭsich napramkach.
Biełaruski bok nie zhodny z hetymi ŭmovami. Minsk nastojvaje na litaralnym vykanańni normaŭ, zakładzienych u naftavych pahadnieńniach, padpisanych u ramkach stvareńnia AEP i ratyfikavanych biełaruskim parłamientam.
«Napiaredadni Novaha hoda ŭ Maskvie išli dosyć napružanyja pieramovy, jakija pakul nie zajmieli pośpiechu. Ciapier u Rasii navahodnija i kaladnyja vakacyi, tamu pieramovy časova prypynienyja», — paviedamili ŭdzielniki naftavaha rynku.
Adnak na siońniašni dzień, pa słovach pradstaŭnika «Biełnaftachimu», «situacyja z časovym prypynieńniem pastavak nafty z Rasii kłopatu nie vyklikaje». «U zavodaŭ jość dastatkova vialikija reštki ź minułych miesiacaŭ, jakich chopić prykładna na 20 dzion pracy na poŭnaj zahruzcy», — adznačyŭ pradstaŭnik kancernu.
Jon padkreśliŭ, što «z ulikam najaŭnych zapasaŭ nafty i kaladnych kanikuł pieramoŭny praces moža być adkładzieny».
Jak paviedamlałasia, Biełaruś i Rasija padpisali 9 śniežnia mižuradavaje pahadnieńnie «Ab paradku vypłaty i zaličeńnia vyvaznych mytnych pošlin (inšych pošlin, padatkaŭ i zboraŭ, jakija majuć ekvivalentnaje dziejańnie) pry vyvazie z terytoryi Respubliki Biełaruś za miežy mytnaj terytoryi Mytnaha sajuza nafty syroj i asobnych katehoryj tavaraŭ, vyrablenych z nafty».
Hetaje pahadnieńnie daje Biełarusi mahčymaść atrymlivać z Rasii naftu i naftapradukty biazmytna i biez vyznačeńnia kvotaŭ.
Pahadnieńnie ŭstupiła ŭ siłu paśla ratyfikacyi Minskam pakieta z 17 pahadnieńniaŭ pa stvareńni Adzinaj ekanamičnaj prastory (AEP) Biełarusi, Rasii i Kazachstana. Parłamient Biełarusi ratyfikavaŭ hetyja 17 pahadnieńniaŭ 21–22 śniežnia 2010.
U 2011 hodzie, zhodna z prajektam paliŭnaha bałansu «sajuznaj dziaržavy», pastaŭki nafty z RF u Biełaruś pavinnyja skłaści 21,7 miljona ton.
