Rasija nie źbirajecca zapluščvać vočy na prablemy pravoŭ čałavieka ŭ Biełarusi, zajaviŭ 3 lutaha ministr zamiežnych spraŭ RF Siarhiej Łaŭroŭpadčas zapisu prahramy Spotlight Alaksandra Hurnova, jakaja vyjdzie ŭ efir na telekanale Russia Today u najbližejšuju subotu.
«Biełaruś — naša bratniaja kraina, stratehičny partnior, ale heta nie aznačaje, što my zapluščym vočy na parušeńnie asnoŭnych pravoŭ i svabod», — cytuje Łaŭrova RIA Novosti.
Pavodle słoŭ ministra, Maskva «nie źbirajecca kiravacca dvajnymi standartami, što nieabchodna dla vykanańnia pravoŭ i svabod u samoj Rasii». «Jość peŭnyja standarty, jość abaviazacielstvy, pad jakimi my padpisalisia», — zajaviŭ Łaŭroŭ.
Jon nazvaŭ «nieprymalnymi» aryšty ŭ Biełarusi kandydataŭ u prezidenty na vybarach 2010 hoda, a taksama dvuch rasijskich hramadzian.
«My sprabujem atrymać bolš jasnaści ŭ biełaruskich kaleh», — skazaŭ kiraŭnik źniešniepalityčnaha viedamstva RF.
Nahadajem, hramadzianie Rasii Arciom Breus i Ivan Haponaŭ uvachodziać u lik abvinavačvanych pa kryminalnaj spravie ab masavych biesparadkach u Minsku 19 śniežnia. Pavodle źviestak rasijskaha pasolstva ŭ Minsku, siońnia im moža być pradjaŭlena kančatkovaje abvinavačańnie.
1 lutaha prezident Rasii Dźmitryj Miadźviedzieŭ daručyŭ rasijskamu MZS uličvać u svajoj pazicyi mierkavańnie pravaabaroncaŭ pa padziejach u Biełarusi paśla prezidenckich vybaraŭ.
2 lutaha Siarhiej Łaŭroŭ zajaviŭ, što Rasija nie padtrymlivaje sankcyi, uviedzienyja Jeŭrasajuzam i ZŠA ŭ dačynieńni da biełaruskich čynoŭnikaŭ, adnak ličyć nieprymalnymi masavyja aryšty paśla prezidenckich vybaraŭ. Jon vykazaŭ nadzieju na toje, što biełaruskija ŭłady apieratyŭna adreahujuć na patrabavańnie Zachadu vyzvalić aryštavanych kandydataŭ u prezidenty, žurnalistaŭ i pravaabaroncaŭ, a taksama zabiaśpiečyć abaronu pravoŭ čałavieka i palityčnych svabod.