Zrešty, sama Taciana kaža, što rašeńnie pra jaje vyklučeńnie prymali na značna vyšejšym uzroŭni, čym kiraŭnictva ŭniversytetu. Pra heta śviedčyć, što «pradstaŭnik vychavaŭčaha adździełu BDEU», jaki pravodziŭ ź dziaŭčynaj hutarku, akazaŭsia supracoŭnikam KDB. Rektar navat nia staŭ vyklikać dla tłumačeńniaŭ studentku-vydatnicu, u jakoj za ŭsie hady navučańnia nie było nivodnaha spahnańnia ci vymovy.
25 listapada za dźvie (!) hadziny jaje vysielili ź internatu — vykinuli na dvor u zavieju.
Reakcyja eŭrapiejskich arhanizacyj była chutkaj. ESIB źviarnuŭsia da Eŭrapiejskaj asacyjacyi ŭniversytetaŭ, kudy ŭvachodzić i BDEU, z prośbaj pierahledzieć členstva biełaruskaha ŭniversytetu.
Eŭrapiejskija partnery BDEU — UNESCO, «Mižnarodnaja adukacyja», Eŭrapiejski moładzievy forum i inš. — atrymali prapanovu spynić kantakty z universytetam. Padtrymali studentku Asacyjacyja rektaraŭ Niamieččyny, universytet Sarbona ŭ Paryžy. Pra studentku napisali viadučyja hazety Eŭropy.
Da rektara Šymava źviarnuŭsia rektar Vienskaha ŭniversytetu Hieorh Vinkler z prośbaj pierahledzieć rašeńnie pra vyklučeńnie Taciany. Takaja ž prośba — i ŭ liście ministra adukacyi Švecyi Lejfa Pahrocki.
Zrazumiełuju salidarnaść z vyhnanaj vykazvaje j moładź. Narveskija studenty ŭ pieršy ž dzień stvaryli internet-staronku, dzie źbirali podpisy ŭ abaronu T.Chomy. Na sieradu ich nabrałosia bolš za 5700 z 40 krainaŭ śvietu. Na analahičnaj biełaruskaj staroncy www.studenty.alternativy.net ich sabrana 720.
U Internecie źjaviŭsia zvarot ananimnaha «Studenckaha kamitetu BDEU», jaki abviaściŭ pra pačatak biesterminovych 30-chvilinnych studenckich strajkaŭ. Sutnaść ich u tym, kab prychodzić štodnia a 9-j da hałoŭnaha korpusu BDEU na Partyzanskim praspekcie j moŭčki stajać. Sama Taciana da abviestki pastaviłasia naściarožana: «Ja takoj struktury nia viedaju. Da taho ž čas vybrany niaŭdała: moj fakultet ciapier zajmajecca ŭ druhuju źmienu, značyć, studenty pračynajucca bližej da abiedu». 28 listapada nijakich «strajkoŭcaŭ» nie było…
Taciana padała skarhu ŭ Ministerstva adukacyi na biespadstaŭnaje vyklučeńnie. Stanoŭčyja charaktarystyki dla studentki paabiacali napisać vykładčyki BDEU.
Za miažu dziaŭčyna nie źbirajecca. Dla Taciany pryncypova davučycca mienavita na fakultecie mižnarodnych adnosinaŭ BDEU: «Hetaksama pryncypova, jak toje, što ja havaru paŭsiudna pa-biełarusku».
Prapanovaŭ pra zamiežnaje navučańnie jana pakul nia maje: «Ale pry maich viedach i zdolnaściach ja pry nieabchodnaści pastuplu na ahulnych umovach». Taciana bačyć pierad saboju niekalki varyjantaŭ raźvićcia padziejaŭ — ad adnaŭleńnia praz sud, da adnaŭleńnia praz hod, dva ci pry novym kiraŭnictvie.
U aŭtorak Taciana Choma sustrełasia z pradstaŭnikami mienskaha ofisu ABSE. Ciapier pradstaŭniki ofisu razhladajuć mahčymaść sustrečy z rektaram BDEU U.Šymavym. Taciana i jaje siabry-studenty, natchnionyja kalasalnaj padtrymkaj, vierać u pieramohu spraviadlivaści.
Kali viarstaŭsia numar, pryjšła viedamka, što rektar Šymaŭ admoviŭsia admianić svajo rašeńnie.
❏
1350 čałaviek
paciarpieli ŭ krainie z palityčnych pryčynaŭ za 2001—2005 hady: aryštoŭvalisia abo byli zvolnienyja, adličanyja z vučelniaŭ. Takija ličby pryvodziać pravaabaroncy.