U Minsku nazvali pieramožcaŭ XIV televizijnaha fiestyvalu armiejskaj pieśni «Zorka»

«Zorka» — adziny ŭ Biełarusi maštabny televizijny štohadovy fiestyval armiejskaj pieśni, zasnavany Ministerstvam abarony Respubliki Biełaruś, Nacyjanalnaj dziaržaŭnaj teleradyjokampanijaj i Ministerstvam kultury. Zvyčajna ŭdzielniki spaborničajuć u čatyroch naminacyjach: «Vykanaŭcy piesień prafiesijnych aŭtaraŭ», «Aŭtary-vykanaŭcy», «Vakalnyja hurty i ansambli, kalektyvy masavaha vykanańnia», «Vykanaŭcy armiejskaj pieśni». Sioleta ŭładalnikam Hran-pry ŭ naminacyi «aŭtary-vykanaŭcy» ŭpieršyniu staŭ radavy sałdat terminovaj słužby Alaksandr Panasiuk ź pieśniaj «A viedajecie, ludzi».

Admietna, što z 19 piesień-pieramožcaŭ XIV fiestyvalu 10 napisany armiejskimi aŭtarami. Naohuł, sioleta «Zorka» nadzvyčaj bahataja na novyja imiony. Možna na palcach pieraličyć kankursantaŭ, jakija ŭdzielničali ŭ fiestyvali nie pieršy hod.

Vielmi ciešyć toje, što pałova, kali nie pieravažnaja bolšaść, piesień-pieramožcaŭ — na biełaruskaj movie.
I heta nievypadkova.

— U Pałažeńni televizijnaha fiestyvalu armiejskaj pieśni, jakoje ja raspracavaŭ čatyry hady tamu, napisana, što vykanaŭca pavinien prapanavać na konkurs nie bolš za dźvie pieśni, adna ź jakich pavinna abaviazkova być na biełaruskaj movie. I kali jon pradstaŭlaje adnu pieśniu, to heta biełaruskamoŭnaja pieśnia, — raspaviadaje Siarhiej Makiej, staršy aficer hałoŭnaha ŭpraŭleńnia ideałahičnaj raboty Ministerstva abarony Biełarusi i aŭtar-vykanaŭca sa stažam. — My zaŭsiody starajemsia zrabić tak, kab u kožnym kancercie była prykładna adnolkavaja kolkaść biełaruskamoŭnych i ruskamoŭnych vystupaŭ. Čamu? Tamu što ŭ našaj krainie dvuchmoŭje, i my starajemsia nikoha nie pakryŭdzić. Darečy, maja pieśnia na biełaruskaj movie «Aficery» taksama pieramahła sioleta.

Fiestyval udaskanalvajecca i źmianiajecca z kožnym hodam. Asabliva heta zaŭvažna mnie, bo ŭ samym pieršym fiestyvali ja ŭdzielničaŭ jak kankursant. Źmianiłasia i toje, pra što śpiavajuć chłopcy. Kali raniej bolš śpiavali pra Vialikuju Ajčynnuju vajnu, to siońnia sałdaty śpiavajuć pra svaju słužbu, svaju Radzimu, šmat cikavych aŭtarskich punktaŭ hledžańnia vykazvajuć u pieśniach.

Hvardyi major Viktar Danilčyk try razy pieramahaŭ u fiestyvali ŭ jakaści aŭtara-vykanaŭcy. Ale sioleta atrymaŭ śpiecyjalny pryz žury «Za raskryćcio biełaruskaj tematyki ŭ patryjatyčnaj pieśni» razam sa svaim vakalnym hurtom «Aljans», jaki stvaryŭ z žonak aficeraŭ. Viktar Mikałajevič piša pieśni pieravažna na biełaruskaj movie. Što jaho, vajennaha čałavieka, natchniaje na heta?

— Pierš za ŭsio mianie natchniaje toje, što ja naradziŭsia tut, u Biełarusi. Na chutary. Było vielmi śmiešna, kali ja pastupiŭ u vajennuju vučelniu ŭ Novasibirsk. I tam chłopcy źbiralisia i prasili: «Nu, skažy, Danilčyk, što-niebudź na biełaruskaj movie!». Im było vielmi cikava pačuć našu havorku. Na žal, zaraz u nas mała chto razmaŭlaje pa-biełarusku. Voś ja i vyrašyŭ bolš piesień pisać na svajoj rodnaj movie.

Dźmitryj Buchcijaraŭ, kamandzir 1-ha adździaleńnia 554-ha vučebnaha ŭzvoda fakulteta procipavietranaj abarony Vajennaj akademii Biełarusi, jaki zakančvaje piaty kurs, pieramoh sa svajoj biełaruskamoŭnaj pieśniaj «Ziamla vajny». Junak pryśviaciŭ jaje svaim dziadulam i babulam, jakija vajavali. Dźmitryj rodam z Rečycy, dzie da vučoby ŭ VNU skončyŭ muzyčnuju škołu pa kłasie bajana i hraŭ tam u muzyčnym ansambli. Biełaruskuju movu dla svajoj pieśni chłopiec vybraŭ nie prosta tak.

— Ščyra kažučy, adredahavać tekst pieśni mnie dapamahli na kafiedry biełaruskaj movy našaj akademii, bo biełaruskuju hramatyku ja krychu padzabyŭsia, — pryznajecca Dźmitryj. — Ja adnolkava pryjazna staŭlusia i da ruskaj, i da biełaruskaj moŭ. Ale ŭsio-tki vielmi pryjemna čuć, kali niechta razmaŭlaje z taboj pa-biełarusku. Mnie vielmi padabajecca miłahučnaść, śpieŭnaść biełaruskaj movy. I mienavita biełaruskuju movu ja liču rodnaj.

Hała-kancert łaŭreataŭ XIV tełevizijnaha fiestyvalu armiejskaj pieśni «Zorka» pa biełaruskim telebačańni možna budzie pahladzieć 9 maja.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?