Eštan: Źmiakčeńnie abvinavačańniaŭ pa spravie ab «masavych biesparadkach» nie paŭpłyvała na pazicyju ES 2

Źmiakčeńnie abvinavačańniaŭ šerahu fihurantaŭ pa spravie ab masavych biesparadkach nie paŭpłyvała na pazicyju Jeŭrasajuza.

Pra heta BiełaPAN paviedamiła Majała Kačyjančyč, pres-sakratar viarchoŭnaha pradstaŭnika ES pa zamiežnych spravach i palitycy biaśpieki Ketryn Eštan.

«Pazicyja Jeŭrasajuza z nahody situacyi ŭ Biełarusi vielmi jasnaja i zastajecca bieź źmienaŭ», — zajaviła Kačyjančyč.

Jana nahadała ab patrabavańni ES da biełaruskich uładaŭ «ab nieadkładnym i biezumoŭnym vyzvaleńni i reabilitacyi ŭsich, chto byŭ zatrymany pa palityčnych matyvach».

Pavodle jaje słovaŭ, u zaležnaści ad raźvićcia situacyi ŭ Biełarusi ES «hatovy razhledzieć novyja adrasnyja miery va ŭsich halinach supracoŭnictva».

Časovy pavierany ŭ spravach ES u Biełarusi Žan-Eryk Cholcapfiel 30 sakavika skazaŭ BiełaPAN: «Kali abvinavačańni źmiakčanyja, to heta dobryja naviny». Razam z tym jon taksama zapatrabavaŭ vyzvaleńnia i reabilitacyi abvinavačanych pa palityčnych matyvach.

Jak paviedamlałasia raniej, śledčaje ŭpraŭleńnie papiaredniaha rasśledavańnia HUUS Minharvykankama 30 sakavika źmianiła abvinavačańnie Siarhieju Vaźniaku, Andreju Dźmitryjevu, Uładzimiru Niaklajevu, Anastasii Pałažancy, Vitalu Rymašeŭskamu i Alaksandru Fiadutu. Jany abvinavačvajucca va ŭčynieńni złačynstva, praduhledžanaha artykułam 342 KK (arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich).

Eks-kandydaty ŭ prezidenty Uładzimir Niaklajeŭ i Vital Rymašeŭski, davieranyja asoby Niaklajeva Alaksandr Fiaduta i Siarhiej Vaźniak, kiraŭnik vybarčaha štaba Niaklajeva Andrej Dźmitryjeŭ i namieśnik staršyni niezarehistravanaj arhanizacyi «Małady front» Nasta Pałažanka źjaŭlajucca fihurantami kryminalnaj spravy ab masavych biesparadkach u Minsku 19 śniežnia 2010.

Raniej im było vystaŭlenaje abvinavačańnie pa častkach 1 i 2 artykuła 293 KK (masavyja biesparadki). Maksimalnaje pakarańnie pa hetym artykule — 15 hadoŭ pazbaŭleńnia voli.

Maksimalnaje pakarańnie pa artykule 342 KK — try hady pazbaŭleńnia voli.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH