Pradstaŭnik Savieta Ministraŭ upeŭnivaje, što jaho ŭstanova nie moža ŭpłyvać na dziejańni Nacbanka.
Vice-premjer Siarhiej Rumas siońnia ŭ intervju infarmacyjnamu ahienctvu BiełTA raskazaŭ svajo bačańnie situacyi na valutnym rynku. Heta pieršy vypadak, kali vysoki čynoŭnik adkryta vykazaŭsia ŭ padrymku praviadzieńnia devalvacyi.
«Adchileńnie ŭ 10% možna aceńvać i nazyvać pa-roznamu, ale pa sutnaści my viartajemsia da množnaści valutnych kursaŭ. I było b dobra, kali b heta 10%-aje adchileńnie aficyjnaha kursu vyrašyła prablemu, ale tyja sihnały, jakija pasyłaje rynak, kažuć pra toje, što hetaha vidavočna niedastatkova. Jak pakazali vyniki tarhoŭ na mižbankavym rynku, za hetyja dni mižbankavy rynak nie ažyŭ, i šerah aŭtarytetnych ekśpiertaŭ vykazvajuć mierkavańnie, što
heta paŭmiera i Nacbanku nieabchodna ažyćciaŭlać dalejšyja kroki ŭ hetym kirunku», —
pryznaŭsia jon.
Vice-premjer upeŭnivaje, što Saviet Ministraŭ nie moža ŭpłyvać na dziejańni Nacbanka: «Toje, što adnosicca da našaj kampietencyi, my sumiesna z Nacbankam vyrašajem, prymajem chaj nie zaŭsiody papularnyja miery…
My zaniepakojeny tym, što pradpryjemstva i hramadzianie nie mohuć zvyčajna kuplać valutu.
My vykazvajem Nacyjanalnamu banku svajo bačańnie hetaha pytańnia».
«Ale ŭ kančatkovym vyniku rašeńnie pytańniaŭ valutnaha rehulavańnia zastajecca za Nacbankam. Nam by chaciełasia, kab situacyja vyrašyłasia i rynak pačaŭ funkcyjanavać. Jakimi instrumientami heta zrabić — Nacbanku lepš bačna», — zaznačyŭ jon.
Pa jaho słovach, devalvacyja źnimie naściarožanaść fundataraŭ.
Rumas vykazaŭ vialiki sumnieŭ u tym, što rasijski kredyt źmienić situacyju na valutnym rynku: «…sihnałam dla admieny ŭviedzienych časavych abmiežavańniaŭ na valutnym rynku nie stanie navat mahčymaje atrymańnie hrošaj ad Rasijskaj Fiederacyi. Takim sihnałam pavinna stać palapšeńnie stanu ekanomiki», — padahulniŭ vice-premjer.
Vice-premjer Siarhiej Rumas zaniaŭ svaju pasadu paśla praviadzieńnia prezidenckich vybaraŭ. Prafiesijny bankir i prychilnik rynku, jon piać hadoŭ kiravaŭ «Biełahraprambankam».
