Staŭki pa kredytach padskočyli da 18,5% 1

Rost kredytnych stavak, prablemy z valutaj, čutki pra blizkuju devalvacyju mohuć istotna naškodzić rynku nieruchomaści, i ŭ pieršuju čarhu siektaru žylla,

Źniziŭšysia da dakryzisnaha ŭzroŭniu, staŭka refinansavańnia z 16 sakavika padskočyła až na 1,5 pracentnych punkty (p. p.). Uśled za joj u bolšaści bankaŭ vyraśli na 0,5–1,5 p. p. staŭki pa kredytach, jakija dajucca na kuplu i budaŭnictva žylla. A ŭ kancy sakavika niekatoryja banki i zusim prypynili pryjom zajavaŭ na atrymańnie kredytaŭ, jakija dajucca na kuplu abo budaŭnictva žylla.

Tak, u suviazi z karektavańniem staŭki refinansavańnia ŭ Biełźniešekanambanku kredyty na finansavańnie nieruchomaści (budaŭnictva, nabyćcio, abmien kvateraŭ abo indyvidualnych žyłych damoŭ) dajucca z 16 sakavika pa staŭkach ad 17,5 da 18,5% hadavych (rost na 1,5 p. p.).

U Biełarusbanku kredyty na budaŭnictva i nabyćcio žylla, a taksama na budaŭnictva kvateraŭ u žyłych damach, jakoje praduhledžvaje sumiesnaje budaŭnictva mašyna-miesca ŭ padziemnym haražy-stajancy, pa-raniejšamu dajucca pad 14,5% — asobam, jakija majuć patrebu ŭ palapšeńni žyllovych umovaŭ, i 17% hadavych — tym, chto nie žyvie ŭ niastačy.

Adzinaje źmianieńnie, jakoje ŭsio ž taki adbyłosia, zakranuła kredyty, jakija pradstaŭlajucca šmatdzietnym siem'jam-čarhavikam. Dla ich staŭka pa kredycie pavialičyłasia z 16 sakavika da 12% hadavych, bo pryviazanaja da staŭki refinansavańnia.

Jak paviedamili ŭ Biełarusbanku, u apošnija dni sakavika nijakich abmiežavańniaŭ pa vydačy kredytaŭ, nijakich źmienaŭ u paradak vydačy kredytaŭ bank nie ŭvodziŭ i pakul uvodzić nie źbirajecca

Pracentnyja staŭki ŭ BPS-banku pavialičylisia z 16 sakavika na 1,5 p. p.: z 14 da 15,5% — dla čarhavikoŭ, z 16 i 17 da 17,5 i 18,5% — dla niečarhavikoŭ. Staŭki pa śpiecprahramie istotna nižejšyja.

Adnak varta mieć na ŭvazie, što BPS-Bank z 28 sakavika časova nie prymaje dakumienty na atrymańnie kredytaŭ ad hramadzian, jakija majuć patrebu ŭ palapšeńni žyllovych umovaŭ.

Pryjorbank pavialičyŭ staŭku pa znoŭ vydavanych kredytach z raniejšych 17,9% da 18,5% hadavych. Jak paviedamili ŭ słužbie kłijenckaj padtrymki, nijakich mieraŭ abmiežavalnaha charaktaru ŭ banku ŭ apošnija dni sakavika nie rabiłasia, adnak pry hetym pavialičylisia terminy razhladu zajavak na atrymańnie kredytaŭ.

U Bielinviestbanku pracentnyja staŭki taksama padraśli. Dla čarhavikoŭ kredyty prapanujucca pad 15% hadavych. Dla astatnich fizičnych asobaŭ — pad 17,5%. Raniej staŭki składali 13,5 i 16% hadavych.

U Parytetbanku pracentnyja staŭki zastalisia na raniejšym uzroŭni — ad 15,5 da 19% hadavych, u zaležnaści ad terminu kredytavańnia.

U Biełhazprambanku pa-raniejšamu dziejničajuć dźvie prahramy kredytavańnia dla tych, chto choča nabyć nieruchomaść. Kredyty vydajucca pa staŭkach 15 i 16% hadavych paśla zaklučeńnia i rehistracyi damovy ipateki i pa staŭkach 17 i 18% — u pieryjad da zaklučeńnia i rehistracyi ipatečnaj damovy.

Biełrasbank daje kredyty pa staŭkach ad 15,5% hadavych (da 16 sakavika było ad 15%).

Biełahraprambank z 28 sakavika naohuł nie kredytuje nabyćcio nieruchomaści. Kredyty na budaŭnictva kvateraŭ i damoŭ bank vydaje pad 15,5% dla tych, chto maje patrebu ŭ palapšeńni žyllovych umovaŭ, pad 18,5% — dla astatnich.

Kali b nie prablemy na valutnym rynku, to padvyšeńnie staŭki refinansavańnia i, jak vynik, padaražańnie kredytaŭ nie zmahli b mocna paŭpłyvać na situacyju na rynku žylla. Ale deficyt dalaraŭ, u jakich fiksujucca kvaternyja ceny, množnaść kursaŭ i čakańnie devalvacyi, jakoj, pa zapeŭnieńni Nacbanka, nie budzie, užo pačynajuć rabić svaju čornuju spravu.

Pieršym na prablemy valutnaha charaktaru adreahavaŭ rynak kamiercyjnaj nieruchomaści. Jašče ŭčora kłijenty hatovyja byli zaklučać pahadnieńni, a siońnia admaŭlajucca ad ich, narakajuć minskija ryełtary. A kolkaść zvarotaŭ u ahienctvy nieruchomaści skaraciłasia ŭ razy za apošnija niekalki tydniaŭ.

Na kvaternym rynku źjaviłasia niervovaść. U pakupnikoŭ pačali ŭźnikać ciažkaści pry atrymańni kredytaŭ. Jość prablemy z kanviertavańniem valuty. Dy i achvotnych kupić žyllo stała mienš.

Kali Nacbank i ŭrad usio ž taki navažacca na razavuju devalvacyju, to pakupnikam i pradaŭcam varta rychtavacca da źnižeńnia cenaŭ na hatovyja kvatery jak minimum na pamier devalvacyi na praciahu pieršych dvuch-troch miesiacaŭ paśla jaje praviadzieńnia.

Što da cenaŭ na žyllo, jakoje budujecca, to ŭ pieraliku na dalary jany adnaznačna źniziacca ŭ vypadku devalvacyi. Ceny ŭ biełaruskich rublach buduć raści pastupova, praparcyjna aficyjnamu indeksu cenaŭ u budaŭnictvie — heta značyć, na 1,5–2% u miesiac jak minimum.

belaruspartisan.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH