Pamior Mikałaj Birukoŭ — adzin ź pieršych vajskoŭcaŭ, što prysiahnuŭ na viernaść Biełarusi. 9

Prysiaha na viernaść Biełarusi 8 vieraśnia 1992 hoda. Na pieršym płanie: pałkoŭnik Uładzimir Baradač, major Aleś Stankievič, padpałkoŭnik Mikoła Birukoŭ, pałkoŭnik Leanid Bałvanovič. Na druhim płanie: lider BNF Zianon Paźniak i padpałkoŭnik Mikoła Statkievič.

«Z hłybokim smutkam paviedamlajem, što siońnia na 55-m hodzie žyćcia paśla praciahłaj chvaroby pamior padpałkoŭnik zapasu, kandydat techničnych navuk Mikałaj Birukoŭ

, — značycca ŭ niekrałohu, składzienym jaho tavaryšami. — Staršy vykładčyk Minskaha vyšejšaha inžyniernaha zienitna-rakietnaha vučylišča Mikałaj Mikałajevič Birukoŭ byŭ u liku tych aficeraŭ, jakija ŭ 1980-ch hadach dałučylisia da ruchu za dziaržaŭnuju niezaležnaść Biełarusi. Jon byŭ adnym z zasnavalnikaŭ i aktyŭnych siabraŭ Biełaruskaha zhurtavańnia vajskoŭcaŭ — hramadskaj arhanizacyi, jakaja vystupała za stvareńnie samastojnaha biełaruskaha vojska.

8 vieraśnia 1992 h. — u Dzień vajskovaj słavy — Mikałaj Birukoŭ byŭ u liku vajskoŭcaŭ, jakija pieršyja prysiahnuli na viernaść Biełarusi.

Z pačatku 1990-ch hadoŭ Mikałaj Birukoŭ dałučyŭsia da biełaruskaha sacyjał-demakratyčnaha ruchu, staŭ siabram Biełaruskaj sacyjał-demakratyčnaj Hramady. Byŭ mižnarodnym sakratarom Biełaruskaj sacyjał-demakratyčnaj partyi (Narodnaj Hramady).

Za svaju patryjatyčnuju dziejnaść Mikałaj Birukoŭ źviedaŭ represii z boku hienieralitetu, vymušany byŭ pakinuć vajskovuju słužbu.

Vykazvajem hłybokaje spačuvańnie rodnym i blizkim Mikałaja Mikałajeviča, usim jaho siabram.

U našaj pamiaci Mikałaj Birukoŭ nazaŭsiody zastaniecca jak nadziejny i ščyry tavaryš, jaki kanca svajho žyćcia zachavaŭ viernaść Baćkaŭščynie i ideałam demakratyi», — adznačajecca ŭ spačuvańni.

List padpisany imionami sacyjał-demakrataŭ i siabroŭ Biełaruskaha zhurtavańnia vajskoŭcaŭ. Heta Uładzimir Baradač, Leanid Dziejka, Anatol Hurynovič, Valer Kostka, Vital Małaška, Anatol Sidarevič, Aleś Stankievič, Mikałaj Statkievič, Stanisłaŭ Sudnik, Aleh Trusaŭ, Siarhiej Čysłaŭ.

Unieści ŭ śpis imia Mikoły Statkieviča, jaki zaraz znachodzicca ŭ SIZA KDB, vyrašyli paplečniki. «Mikoła musić raźvitacca z svaim tavaryšam choć by simvalična», — adznačyŭ lider BSDP Anatol Sidarevič.

Raźvitańnie ź Mikałajem Birukovym adbudziecca ŭ aŭtorak, 12 krasavika, da 12 hadzin dnia ŭ rytualnaj zale 9-j balnicy (vuł. Siamaški, 8). Pachavajuć Mikałaja Birukova na mohiłkach u Kałodziščach.

0

0

0

0

0

0

SM

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH