Abituryjentaŭ Instytuta žurnalistyki na prafiesijna-psichałahičnym sumoŭi ŭ BDU pytalisia pra toje, ci źjaŭlajucca jany siabrami BRSM, u jakich arhanizacyjach znachodzicca Japonija, i ci viedajuć jany, jaki tyraž «Sovietskoj Biełoruśsii».
Na sumoŭi 9 krasaviku ŭ abituryjentaŭ cikavilisia, u tym liku ci znachodziacca jany ŭ šerahach BRSM.
- Kali ja adkazała, što nie źjaŭlajusia siabram hetaj arhanizacyi, u mianie spytali, čamu. Ja nie stała kazać padrabiaznaści, - raspaviała karespandentu «Salidarnaści» abituryjentka Julija. - Tady mianie paprasili nazvać haziety, jakija vydajucca ŭ maim horadzie. Ja nazvała vydańnie, ź jakim supracoŭničaju. Ale mnie było skazana, što heta pryvatnaja hazieta. «Vy nam dziaržaŭnyja vydańni nazavicie». Potym pajšło pytańnie ab nacyjanalnych vydańniach, jakija ja viedaju. Ja tolki nazvała «Našu Nivu», jak mianie pierapynili na paŭsłovie. «Nie, vy nazyvajcie dziaržvydańni». Ja nazvała «SB», ale na pytańni ab tym, chto hałoŭny redaktar haziety i jaki ŭ jaje nakład adkazać nie zmahła. «
Vy što, nie viedajecie tyraž «SB»?» - Aburyŭsia dziadźka z kamisii.
Tym nie mienš, sumoŭje Jula prajšła.
- U kalidory my paznajomilisia z maładym čałaviekam, jaki taksama źbirajecca pastupać na žurnalistyku, - praciahnuła surazmoŭca. - Na pytańnie kamisii, čamu jon choča stać žurnalistam, chłopiec skazaŭ, što jon choča nieści ludziam praŭdu.
«Adkryjem tabie sakret: u Biełarusi takoha nie budzie, - zajaviŭ siabra kamisii. - Ty budzieš pisać toje, što tabie skažuć».
Cikava, što pytańni na sumoŭi budučym žurnalistam niekalki adroźnivajucca ad tych, što raźmieščany na sajcie BDU.
U pieršuju čarhu, u abituryjenta vyśviatlajuć matyvacyju vybaru prafiesii, płany abituryjenta na budučyniu, jaho ŭdzieł u hramadskaj rabocie, dziełavyja jakaści, erudycyju, koła intaresaŭ, jaho dasiahnieńni ŭ vučobie, jaho kamunikatyŭnuju kampietentnaść i emacyjna-pavodzinnuju śfieru.
Budučych žurnalistaŭ mohuć spytać pra asablivaści ŚMI abo zadać im pytańni, jakija dazvolać vyznačyć uzrovień ahulnaha raźvićcia. Naprykład, što cikavaha vy možacie raspavieści zamiežniku pra kulturu i tradycyi naroda Biełarusi, jakija histaryčnyja padziei ŭ biełaruskaj historyi vy ličycie samymi važnymi, kali śviatkujecca Dzień niezaležnaści našaj krainy, ź jakimi dziaržavami ŭstalavanyja najbolš tryvałyja ŭzajemavyhadnyja adnosiny.
