Pradjaŭlena abvinavačańnie padazravanym u ździajśnieńni teraktu 13

Pa fakcie vybuchu ŭ mietro abvinavačańnie ŭ teraryźmie vystaŭlenaje dvum hramadzianam Biełarusi, paviedamiŭ žurnalistam 29 krasavika namieśnik hienieralnaha prakurora, kiraŭnik śledčaj hrupy Andrej Švied.

Pavodle jaho słovaŭ, im stavicca ŭ vinu ździajśnieńnie złačynstva, praduhledžanaha č. 3 art. 289 Kryminalnaha kodeksa (teraryzm). Jany abvinavačvajucca ŭ tym, što

ŭčynili terakt pa papiaredniaj zmovie z metaj destabilizacyi abstanoŭki, zastrašvańnia nasielnictva i zabojstva ludziej.

Adnamu z abvinavačanych u terakcie ŭ mietro taksama vystaŭlenaje abvinavačańnie pa č. 3 art. 295 KK (niezakonnaje abaračeńnie zbroi).

Akramia taho, paviedamiŭ Švied, adnamu z abvinavačanych u vybuchu ŭ mietro vystaŭlenaje abvinavačańnie pa faktach teraryzmu 14 i 22 vieraśnia 2005 hoda ŭ Viciebsku i ŭ noč z 3 na 4 lipienia 2008 hoda ŭ Minsku. «Hetyja złačynstvy, jak minimum, ździejśniŭ adzin čałaviek», — skazaŭ Švied.

Pavodle jaho słovaŭ, pravaachoŭnyja orhany z pryciahnieńniem vajskoŭcaŭ Uzbrojenych sił, kinołahaŭ i sapioraŭ vyjavili i praviali ahlad učastka miascovaści ŭ pryharadzie Viciebska — svojeasablivaha palihona, dzie abvinavačanyja davoli praciahły čas

pravodzili vyprabavańni vybuchovych pryładaŭ, fiksujučy ich na fota i videa.

Andrej Švied zajaviŭ, što ŭ 2009 hodzie ŭ pravaachoŭnych orhanaŭ užo była mahčymaść vykryć asobu, jakaja ŭčyniła terarystyčny akt u 2008 hodzie ŭ Minsku.

Adnak praz chałatnaść słužbovych asobaŭ hetaha zroblena nie było.

Havorka idzie pra toje, što abvinavačany nie byŭ daktyłaskapijavany padčas pryzyvu ŭ vojska. Pa fakcie chałatnaści raspačataja kryminalnaja sprava.

Namieśnik hienprakurora taksama paviedamiŭ, što

matyŭ złačynstva «praktyčna vyśvietleny».

«Jon źviazany z asobami abvinavačanych, ich raźvićciom, staŭleńniem da žyćcia, vychavańniem», — skazaŭ Švied.

Pavodle jaho słovaŭ, u momant ździajśnieńnia złačynstva abvinavačanyja byli pry svaim rozumie, ale kančatkovaje zaklučeńnie pa hetym pytańni daść ekśpiertyza.

Namieśnik hienprakurora zajaviŭ, što śledstva nie vałodaje jakimi-niebudź dadzienymi «pra toje, što ŭ aktach teraryzmu byli zamoŭcy albo arhanizatary». Akramia dvuch abvinavačanych pa spravie prachodziać čaćviora padazravanych. Pra mieru strymańnia ŭ dačynieńni da ich Švied kazać nie staŭ u intaresach śledstva.

Jon paćvierdziŭ, što abvinavačvanyja płanavali ŭčynić sieryju teraktaŭ,

«ale dzie, kali i jakim sposabam — tajamnica śledstva».

Miarkujučy pa słovach namieśnika hienprakurora, data 11 krasavika 2011 była abranaja nievypadkova. Jana tłumačycca peŭnaj «zakanamiernaściu dziejańniaŭ i padziej». Pry hetym Švied adznačyŭ, što terakt moh być učynieny dniom raniej ci dniom paźniej.

Śledstva pa-raniejšamu nie nazyvaje proźviščaŭ abvinavačanych.

Razam z tym, Švied paviedamiŭ, što abodva abvinavačanych 1986 hoda naradžeńnia, uradžency adnaho z abłasnych centraŭ, raśli ŭ adnym dvary, siabravali sa škoły.

Pavodle słovaŭ namieśnika hienprakurora, pryniatyja ŭsie nieabchodnyja miery, kab ich svajaki byli abaronienyja ad lubych supraćpraŭnych dziejańniaŭ.

Švied paviedamiŭ, što va ŭsich abvinavačvanych i padazravanych jość abaroncy, śledčyja dziejańni ŭ dačynieńni da ich pravodziacca ŭ prysutnaści advakataŭ i fiksujucca na videa.

Pavodle jaho infarmacyi, u miežach rasśledavańnia ŭžo pryznačanyja i vykonvajucca kala 400 sudova-miedycynskich, kryminalistyčnych i inšych ekśpiertyzaŭ. Dapytana bolš za 300 hramadzian, praviedziena bolš za 500 inšych śledčych dziejańniaŭ.

Nahadajem, u vyniku vybuchu kala steły «Horad-hieroj Minsk» u 2008 hodzie paciarpieli 54 čałavieki, paśla vybuchaŭ u Viciebsku ŭ 2005 hodzie było kala paŭsotni paranienych.

U vyniku vybuchu ŭ minskim mietro 11 krasavika 2011 paciarpieła ŭ ahulnym bolš za 200 čałaviek. Ź ich 14 zahinuli, 167 byli špitalizavanyja.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH