Biełaruś budzie prapanoŭvać novuju canu na tranzyt rasiejskaha hazu. Košt pastavak hazu i tranzytu ŭzajemaźviazanyja. Pra heta paviedamiŭ žurnalistam pieršy vice‑premjer biełaruskaha ŭradu Ŭładzimier Siamaška, kamentujučy pieramovy z «Hazpromam».
Jon zaznačyŭ, što kali cana na haz dla Biełarusi padymiecca na 60% ad siońniašniaj(z $46,68 da $75), to staŭka na tranzyt pavialičycca da minimum $1,3.
Pavodle Siamaški, Biełaruś pradastaviła «Hazpromu» biesprecedentnyja ŭmovy dla transpartavańnia hazu pa terytoryi našaj krainy. Staŭka 75 centaŭ za tranzyt pa 100 km trubapravodu — samaja nizkaja, mieniej navat, čym u Rasiei. Va Ŭkrainie jana składaje $1,6, u Polščy ‑ $2,5, u druhich krainach ‑ $3,5 za pierapampoŭvańnie1 tys. kub.m. na 100 km. Na tym, što adlehłaść pa Biełarusi ad uschodniaj miažy da zachodniaj składaje tolki 500 km i šlach hety karaciej dla Rasiei ŭ Eŭropu na našaj terytoryi, čym pa ŭkrainskaj, «Hazprom» atrymlivaje dobry prybytak. Tut rasiejskaja kampanija maje čystaha prybytku $882 młn., skazaŭ Uładzimier Siamaška.
«A my siońnia spračajemsia za $2,5 młrd. (50% koštu pakietu akcyj AAT «Biełtranshaz»). Heta suma za 2,5 hodu akupajecca», adznačyŭ pieršy vice‑premjer. Pry tym, što siońnia hazatranspartnaja systema niedahružana. Ale ŭ planach «Hazpromu» vyvieści jaje na poŭnuju zahruzku ‑ pierapampoŭvać u hod pa terytoryi Biełarusi 61 młrd.kub.m. Heta daść mahčymaść atrymlivać $1,2 młrd. u hod čystaha prybytku dla «Hazpromu». «Choć rasiejskaja kampanija sprabuje pierakanać usich u tym, što heta truba joj nie nadta i patrebnaja», ‑ reziumavaŭ U. Siamaška.
