Novy košt rasiejskaj nafty dla Biełarusi moža pryvieści da spynieńnia biełaruskich pierapracoŭčych zavodaŭ, pryznaŭ pieršy vice‑premjer Uładzimier Siamaška. Kab paźbiehnuć kryzisu, Miensk prapanavaŭ Maskvie kampramisny varyjant padziełu mytaŭ za ekspart ź Biełarusi śvietłych naftapraduktaŭ, vyrablenych z rasiejskaj syraviny.
Rašeńnie rasiejskaha ŭradu pra ŭviadzieńnie z 1 studzienia ekspartnaha myta na naftu, jakaja pradajecca ŭ Biełaruś, moža adbicca na biełaruskaj ekanomicy nia mienš baluča, čym padvyšeńnie koštaŭ na haz. Kožnaja tona rasiejskaj nafty, jakaja ekspartujecca ŭ Biełaruś, aŭtamatyčna padaražeje na 180 dalaraŭ.
Užo ŭ studzieni za tonu nafty daviadziecca płacić 405 dalaraŭ, pryznaŭ pieršy vice‑premjer Uładzimier Siamaška. Pavodle niezaležnych acenak, košt nafty vyraście da 450 dalaraŭ. «Takoje ŭražańnie, što Rasieja choča spynić našy NPZ, heta cisk na Biełaruś», — zajaviŭ spadar Siamaška. Pavodle jahonych słovaŭ, myty na pastaŭku rasiejskaj nafty razburajuć sajuznuju dziaržavu j jaje asnoŭnyja pryncypy.
Adnak Uładzimier Siamaška miarkuje, što jašče nia ŭsio stračana: biełaruski ŭrad nakiravaŭ u Maskvu prajekt novaha pahadnieńnia ab padziele mytaŭ ad ekspartu naftapraduktaŭ, vyrablenych u Biełarusi z rasiejskaj syraviny. Miensk prapanuje padzialić myty paroŭnu pamiž biełaruskimi j rasiejskim biudžetami.
Rasiejski ŭrad abiacaŭ razhledzieć hetyja prapanovy da 17 studzienia.
Pakul što praciahvajucca pieramovy nakont pastavak rasiejskaj nafty ŭ Biełaruś u 2007 hodzie, paviedamiŭ pradstaŭnik «Biełnaftachimu» Viktar Azaraŭ:
(Azaraŭ: ) «Pracujem nad pytańniami z rasiejskimi kampanijami, pytańni vyrašajucca. Jak zakončacca pieramovy, to kali kiraŭnictva kancernu paličyć patrebnym, my damo infarmacyju ŭ presu. U pracesie pieramovaŭ my kamentaryjaŭ nie dajem».
Na dumku ahladalnicy hazety «Biełorusy i rynok» Taciany Manionak, novyja myty na rasiejskuju naftu robiać niavyhadnym jaje ekspart u Biełaruś dziela pieraprodažu naftapraduktaŭ na Zachad, ad čaho biełaruski biudžet mieŭ vialikuju vyhadu. Tym nia mieniej, vialikija kampanii — «Łukojł», «Surhutnieftiehaz» — buduć imknucca zachavać svaju prysutnaść na biełaruskim rynku, čaho nia skažaš pra mienšyja firmy.
Mienski ekanamist Leanid Złotnikaŭ miarkuje, što biełaruskija ŭłady vymušanyja prapanavać Rasiei surjoznyja sastupki, i prahnazuje, što rašeńnie moža być uchvalenaje Maskvoju ŭ kompleksie z hazavym pahadnieńniem.
(Złotnikaŭ: ) «U Rasiei niama takich nadziejnych sposabaŭ spynić spažyvańnie ŭ Biełarusi taho hazu, jaki budzie pierapampoŭvacca na Zachad. Tamu ŭžyvajecca inšy ryčah cisku na Biełaruś — naftavy. Im možna bolš nadziejna cisnuć».
Pavodle spadara Złotnikava, pakul nia budzie damoŭlenaści ŭ hazavym pytańni, Rasieja nia pojdzie na sastupki ŭ naftavym. Ale ŭ lubym vypadku raźličvać na raniejšyja abjomy rasiejskaj nafty Miensku nie davodzicca, bo ŭ camoj Rasiei raście spažyvańnie nafty.
Pavodle acenak biełaruskich ekanamistaŭ, straty biudžetu Biełarusi ad uviadzieńnia myta na pastaŭki rasiejskaj nafty składuć kala 3 miljardaŭ dalaraŭ.
