Prezident Biełarusi Alaksandr Łukašenka 27 śniežnia padpisaŭ Dyrektyvu numar 2 «Ab mierach pa dalejšaj debiurakratyzacyi dziaržaŭnaha aparatu».
Jak rastłumačyli BIEŁTA u pres‑słužbie kiraŭnika dziaržavy, asnoŭny akcent zrobleny na toje, kab maksimalna zabiaśpiečyć intaresy hramadzian pry ich zvarocie ŭ dziaržorhany.
U pres‑słužbie prezidenta nahadali, što deviz hetaj piacihodki ‑ pabudova dziaržavy dla naroda. Klučavym napramkam u vyrašeńni hetaj zadačy źjaŭlajecca dalejšaja debiurakratyzacyja dziejnaści dziaržaŭnych orhanaŭ i inšych dziaržaŭnych arhanizacyj.
Debiurakratyzacyja ŭklučaje dva składalniki.
Pieršy ‑ udaskanaleńnie raboty dziaržorhanaŭ z nasielnictvam. U hetaj śfiery kiraŭnikom dziaržavy pryniaty ŭžo šerah rašeńniaŭ, u pryvatnaści, Dekret Prezidenta Respubliki Biełaruś ad 14 studzienia 2005 h. numar 2 «Ab udaskanaleńni raboty z nasielnictvam», ukazy Prezidenta Respubliki Biełaruś ad 12 maja 2005 h. numar 220 «Ab niekatorych mierach pa spraščeńniu paradku praviadzieńnia nataryjalnych dziejańniaŭ», ad 13 vieraśnia 2005 h. numar 432 «Ab niekatorych mierach pa ŭdaskanaleńniu raboty z hramadzianami ŭ dziaržaŭnych orhanach, inšych dziaržaŭnych arhanizacyjach», ad 16 sakavika 2006 h. numar 152 «Ab zaćviardžeńni pieraliku administracyjnych pracedur, što vykonvajucca dziaržaŭnymi orhanami i inšymi dziaržaŭnymi arhanizacyjami pa zvarotach hramadzian za vydačaj daviedak abo inšych dakumientaŭ». Prezidentam Respubliki Biełaruś dadzieny ŭsioabdymnyja daručeńni pa aptymizacyi dziejnaści dziaržaŭnych orhanaŭ z nasielnictvam.
Takim čynam, na siońniašni dzień isnuje kompleksnaje pravavoje rehulavańnie pa nazvanamu napramku debiurakratyzacyi, što praduhledžvaje jak jurydyčnyja, tak i arhanizacyjna‑rasparadčyja miery. Zadača ŭ tym, kab naležnym čynam vykonvać toje, što rehłamientavana, zabiaśpiečyć praktyčnuju realizacyju pryniatych aktaŭ, naładzić efiektyŭny miechanizm ich prymianieńnia.
Druhi składalnik ‑ aptymizacyja ŭnutranaj dziejnaści dziaržorhanaŭ, paradku ŭzajemadziejańnia pamiž imi, debiurakratyzacyja samoha dziaržaparatu, skaračeńnie pierapiski i spravazdačnaści.
Na žal, niaredka supracoŭniki dziaržorhanaŭ značny abjom svajho rabočaha času vymušany zatračvać na padrychtoŭku i składańnie roznych spravazdač i daviedak, inšym razam navat dublirujučych adzin adnaho.
Usio heta ŭ kančatkovym vyniku niehatyŭna ŭpłyvaje na vykanańnie rabotnikami dziaržorhanaŭ svaich asnoŭnych funkcyj.
Patrabujuć dalejšaha ŭdaskanaleńnia formy, mietady i styl raboty dziaržaparatu. U niekatorych dziaržorhanaŭ pa‑raniejšamu nie ŭstanoŭleny zručny dla nasielnictva režym raboty, što ŭskładniaje mahčymaść hramadzianina trapić na pryjom da čynoŭnika; dla vyrašeńnia elemientarnych žyćciovych pytańniaŭ čałavieku davodzicca doŭhi čas čakać svajoj čarhi; majuć miesca asobnyja prajaŭleńni farmalizmu, nietaktoŭnych pavodzin i niepavahi da ludziej.
Takoje stanovišča spraŭ niedapuščalnaje. Dla ŭstaranieńnia nazvanych niehatyŭnych źjaŭ prezidentam vydadziena Dyrektyva numar 2, nakiravanaja na dalejšuju debiurakratyzacyju dziaržaŭnaha aparatu.
U dyrektyvie zamacavany tyja padychody, jakija ciapier źjaŭlajucca aktualnymi, asabliva nieabchodnymi i pieršačarhovymi.
Treba adznačyć, što za ŭsiu historyju suvierennaj Biełarusi heta druhaja dyrektyva prezidenta krainy. Dyrektyva numar 1, vydadzienaja 11 sakavika 2004 hoda, była nakiravana na ŭmacavańnie hramadskaj biaśpieki i dyscypliny.
Padpisańnie Dyrektyvy numar 2 nahladna paćviardžaje toje vialikaje značeńnie, jakoje nadajecca debiurakratyzacyi. Zadača pa niedapuščeńniu prajaŭ farmalizmu, vałakity, praduziataści, abyjakavaści ŭ adnosinach da hramadzian razhladajecca jak nieadjemnaja častka zabieśpiačeńnia nacyjanalnaj biaśpieki. Tamu što stvareńnie ŭsiebakova kamfortnych umoŭ dla žyćciadziejnaści ludziej ‑ heta i jość pabudova dziaržavy dla naroda, jość vyšejšaja meta našaj dziaržavy, padkreślili ŭ pres‑słužbie prezidenta.
