U Breście 19 červienia adkryty pamiatny znak achviaram Chałakostu. Miemaryjalny znak ustanoŭleny na mohiłkach «Paŭnočnyja», dzie ŭ listapadzie 2010 hoda ŭ brackaj mahile byli pachavanyja astanki 350 bresckich jaŭrejaŭ, rasstralanych u hady Vialikaj Ajčynnaj vajny.
U cyrymonii adkryćcia pomnika ŭziali ŭdzieł pradstaŭniki miascovaj ułady, dypłamatyčnych misij u Breście, Sajuza biełaruskich jaŭrejskich hramadskich abjadnańniaŭ i abščyn, bresckaj jaŭrejskaj abščyny, vieterany Vialikaj Ajčynnaj vajny.
Na cyrymonii zaznačałasia, što ŭ hetaj brackaj mahile pachavanyja astanki jaŭrejaŭ, źniščanych fašystami ŭ vieraśni 1942 hoda na ŭskrainie byłoj vioski Hieršony, jakaja zaraz uvachodzić u haradskuju rysu Bresta. Pavodle ŭspaminaŭ staražyłaŭ, achviarami byli staryja, žančyny i dzieci.
«Usiaho na terytoryi Bresckaj vobłaści 76 miescaŭ masavaha rasstrełu jaŭrejaŭ u hady Vialikaj Ajčynnaj vajny. Na 17 ustanoŭlenyja pamiatnyja znaki achviaram Chałakostu. Sioleta buduć adkrytyja jašče dva — u Ivacevickim rajonie», — paviedamiŭ staršynia Bresckaj haradskoj jaŭrejskaj hramadskaj arhanizacyi «Brysk» Barys Bruk.
Namieśnik staršyni Bresckaha harvykankama Mikałaj Biaśko padkreśliŭ, što hety pamiatny znak — jašče adzin napaminak pra toj strašny čas.
«Z 50 tys. čałaviek, jakija žyli ŭ Breście napiaredadni Vialikaj Ajčynnaj vajny, 26 tys. byli pradstaŭnikami jaŭrejskaha naroda. U pieršyja ž miesiacy vajny hitleraŭskija zachopniki rasstralali značnuju častku jaŭrejskaha nasielnictva horada, izalavaŭšy astatnich u hieta. 15 kastryčnika 1942 hoda jaho viaźni byli rasstralanyja ŭ rvach pad Bronnaj haroj», — skazaŭ Biaśko.
Udzielniki mierapyriemstva ŭskłali vianki i kvietki da pomnika, ušanavali pamiać zahinułych chvilinaj maŭčańnia. Miemaryjalny znak — hranitnaja steła, jakuju viančaje minora, z pamiatnym nadpisam na iŭrycie, biełaruskaj i anhlijskaj movach. Eskiz pomnika raspracavany ŭ Minsku, u tvorčaj majsterni pry Sajuzie biełaruskich jaŭrejskich hramadskich arhaizacyj i abščyn. Srodki na jaho vyrab vydzieliŭ Fond Łazarusaŭ (Vialikabrytanija).
