Małady Front (zarehistravany ŭ Čechii) źviarnuŭsia da ministra kultury Paŭła Łatuški i ministra ŭnutranych spravaŭ Anatola Kulašova z nahody moŭnaj prablemy palitviaźniaŭ.
«My zaniepakojeny losam palitźniavolenych i ŭmovami adbyćcia pakarańnia, u jakich jany vymušany znachodzicca. Nakolki nam viadoma, u turmie lidar „Maładoha Frontu“ Źmicier Daškievič maje prablemy ź biełaruskaj movaju. Adčuvajem, što padobnyja prablemy mahli ŭźniknuć u inšych niezakonna asudžanych paśla masavych represij 19 śniežnia 2010 h. Artykuł 17 Kanstytucyi abviaščaje, što dziaržaŭnymi movami źjaŭlajucca i biełaruskaja, i rasijskaja. Heta jurydyčna zamacoŭvaje adnolkavy status dźviuch movaŭ. My nie razumiejem, čamu Źmicier Daškievič — fiłołah pa adukacyi — vymušany praz skarhi damahacca vykanańnia svaich kanstytucyjnych pravoŭ.
My prosim vas paŭpłyvać na stvareńnie narmalnych umovaŭ adbyćcia pakarańnia. U pryvatnaści — likvidavać moŭnuju prablemu, jakuju štučna stvaraje administracyja Žodzinskaj turmy».
Zvarot na imia Paŭła Łatuški i Anatola Kulašova nakiravała namieśnica staršyni MF Nasta Pałažanka.
Nahadajem, na minułym tydni Źmicier Daškievič nakiravaŭ skarhu na imia Hienieralnaha prakurora z patrabavańniem pravieści pravierku z nahody niekarektnaha i abraźlivaha staŭleńnia da palitviaźnia z boku administracyi Žodzinskaj turmy.