«Prašu Vas pravieści pravierku ŭ Śledčym izalatary № 8 pa faktach niekarektnaha i abraźlivaha staŭleńnia z boku administracyi SIZA -8 da asobaŭ, katoryja ŭtrymoŭvajucca pad vartaju»,— z takich słovaŭ pačynajecca zvarot lidara niezarehistravanaha «Maładoha frontu» Źmitra Daškieviča ŭ Hienieralnuju prakuraturu Biełarusi.
U joj palitviazień ukazvaje, što za niepraciahły čas kiraŭnictva žodzinskaha SIZA nieadnarazova parušała jaho pravy jak źniavolenaha, a ŭnutranyja praviły, jakija panujuć u kałonii, časam dachodziać da absurdu.
U pryvatnaści, Daškievič zhadvaje pra fizičnyja pakarańni i pahrozy nasilla, zabaronu mieć knihi i patrabavańnie administracyi SIZA adkazvać na ŭsie pytańni nahladčykaŭ choram i
Pieradać zvarot u Hienprakuraturu Daškieviču ŭdałosia tolki z advakatam, jakaja naviedała jaho ŭ Žodzina ŭ piatnicu. «Ja dumaju, Źmicier pisaŭ mnie ab usim hetym i raniej, tolki listy nie dachodzili. Jon numaruje ich, a ja atrymlivaju daloka nie ŭsio», — raskazała «NN» aktyvistka «MF» Nasta Pałažanka. Dziaŭčyna ličyć, što administracyja SIZA śviadoma dziejničaje z parušeńniami ŭ dačynieńni da Źmitra, žadajučy vysłužycca, złamaŭšy palitviaźnia.
«Ja liču, što heta miascovaja inicyjatyva. Jany prosta chočuć pakazać, što zmusili palitviaźnia padparadkoŭvacca im. Ab hetym havoryć i pieraduziataje staŭleńnie, i zabarona karystacca biełaruskaj movaj.Adnak ja chaču zaŭvažyć, što nivodzin taki krok z boku administracyi SIZA nie zastaniecca biez uvahi. My daviedajemsia proźviščy tych, chto akazvaje cisk na Źmitra i dabjemsia taho, kab jany fihuravali ŭ „čornych śpisach“ ES. Kožny pavinien adkazvać za toje, što robić», — raspaviała N.Pałažanka.
Zaraz Źmicier Daškievič, asudžany na dva hady źniavoleńnia, čakaje etapu ŭ Horki. Hetaja kałonija ličycca adnoj z samych žorstkich u krainie.
