Karystalniku adnoj z supołak «Vkontaktie» Maratu Abramoŭskamu ź Minska na minułym tydni patelefanavali śpiecsłužby. Małady čałaviek źbiraŭsia ŭdzielničać u fłeš-mobie, sabraŭšy čerhi kala abmieńnikaŭ. Maratu paraili nie pravodzić padobnuju akcyju. Jon prysłuchaŭsia, paličyŭšy, što heta nie taja akcyja, ź jakoj varta padstaŭlacca i «leźci na ražon».

Alaksandra Libiera i Maksima Hajkova ź Viciebska prymusova advieźli na razmovu z prakuroram. Maładych ludziej zatrymali za ŭdzieł u akcyi pratestu 15 červienia na hałoŭnaj płoščy horada. Libiera i jašče čatyroch čałaviek zatrymali adrazu paśla pačatu akcyi. Advieźli ŭ RAUS Kastryčnickaha rajona Viciebska. Alaksandra paśla dastavili ŭ prakuraturu.

Demaktyvista Maksima Hajkova zatrymali supracoŭniki KDB: jany spynili tralejbus, u jakim jon jechaŭ. I taksama zavieźli ŭ prakuraturu.

Razmovu prakuror vioŭ pa čarzie. Abodvum prypisvałasia arhanizacyja akcyi ŭ Viciebsku. Im byli prademanstravany razdrukoŭki ich telefonnych razmoŭ. Prapanavali spynić dziejnaść, bo sprava moža nabyć inšy charaktar. Maŭlaŭ, adkaznaść praduhledžvajecca kryminalnaja. Paśla maładych ludziej adpuścili.

Jak paviedamili ŭ pres-słužbie hramadzianskaj kampanii «Jeŭrapiejskaja Biełaruś», 11 červienia pad ciskam supracoŭnikaŭ KDB była vydalena supołka «Revalucyja praz sacyjalnyja sietki ŭ Salihorsku» «Vkontaktie».

13 červienia prafiłaktyčnuju hutarku praviali z administrataram hrupy «Nadakučyŭ nam hety Łukašenka» «Vkontaktie» Maksimam Čarniaŭskim.

«Mianie vyklikali pa telefonie, — skazaŭ Maksim. — Ja prabyŭ tam bolš za čatyry hadziny. Spačatku sa mnoj doŭha razmaŭlaŭ adzin supracoŭnik. Jon patłumačyŭ mnie surjoznaść situacyi, što hetyja štotydniovyja schody na płoščy — tolki padrychtoŭka da taho, kab 3 Lipienia adbylisia surjoznyja padziei. Tamu ciapier i pravodziacca prafiłaktyčnyja razmovy z administratarami hrup «Vkontaktie». Patłumačyli, jakaja mnie moža pahražać adkaznaść – pakazali čatyry ci piać artykułaŭ, pad jakija ja mahu pajści, kali pačnucca masavyja biesparadki. Raspytvali pra administravańnie ŭ hrupie «Nadakučyŭ nam hety Łukašenka», u administratary jakoj ja bolš nie ŭvachodžu, ab čym i paviedamiŭ».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?