Skandalna viadomy baksior i kryminalnik Viačasłaŭ Dacyk pa mianušcy Rudy Tarzan pačuŭ klič biełaruskaj kryvi. Znachodziačysia ŭ znakamitaj picierskaj turmie «Kriesty», jon zajaviŭ pra žadańnie atrymać biełaruskaje hramadzianstva i ciapier teraryzuje turemnuju administracyju, patrabujučy pierakładać usie dakumienty na biełaruskuju movu.
Biełaruskija karani Dacyka, jak i mnohaje inšaje ŭ jaho bijahrafii, aficyjna nie paćvierdžanyja. Nibyta biełarusam byŭ jaho dzied, a sapraŭdnaje jaho proźvišča — Dacuk — skazili rehistravalnyja orhany Rasii.
Naradziŭsia Viačasłaŭ hadoŭ hetak tryccać tamu ci to ŭ miastečku Słancy Leninhradskaj vobłaści, ci to ŭ samim Leninhradzie. Ź dziacinstva byŭ zabijakam, zachaplaŭsia adzinaborstvami, stajaŭ na ŭliku ŭ milicyi. Da 1998 hoda ŭvachodziŭ u fiederacyju tajskaha boksa. Niekatoryja krynicy nazyvajuć jaho čempijonam śvietu pa bajach biez praviłaŭ, adnak aficyjnaha paćvierdžańnia hetamu niama. Viadomaść atrymaŭ za pieramohu ŭ debiutnym pajadynku nad biełarusam Andrejem Arłoŭskim, jaki paźniej staŭ čempijonam śvietu ŭ ciažkaj vazie pa viersii UFC. Naohuł, spartyŭny los šeść razoŭ sutykaŭ Dacyka na rynhu ź biełarusami. Dvojčy jon śviatkavaŭ pieramohu, u astatnich vypadkach prajhraŭ, apošni raz (u 2003 hodzie) — znakamitamu biełaruskamu kikbaksioru Siarhieju Huru, jaki pasłaŭ Rudoha Tarzana ŭ nakaŭt. Dacyk viadomy taksama svaimi ekscentryčnymi i časta niespartyŭnymi pavodzinami na rynhu.
Viačasłaŭ «paviernuty» na idejach nacyjanalizmu i pieravahi biełaj rasy, byŭ siabram paźniej zabaronienaj u Rasii nacyjanalistyčnaj arhanizacyi «Słavianski sajuz».
U 2007 hodzie Viačasłaŭ byŭ aryštavany za sieryju rabavańniaŭ sałonaŭ sotavaj suviazi i juvielirnych kramaŭ, padčas rasśledavańnia pryznany varjatam, źmieščany ŭ psichijatryčnuju kliniku. U žniŭni 2010 hoda źbieh u Narviehiju, dzie paprasiŭ palityčnaha prytułku. Narviežskaja miedycyna pryznała Dacyka zdarovym, jon adbyŭ u miascovaj turmie termin za niezakonnaje našeńnie zbroi.
Dacyka ekstradyjavali ŭ Rasiju, taksama nie biez pryhodaŭ. Rasijskija avijacyjnyja ŭłady dvojčy admaŭlali samalotu ŭ pasadcy ŭ Sankt-Pieciarburhu praz pamyłki ŭ afarmleńni dakumientaŭ, na borcie Viačasłaŭ zładziŭ deboš, palicyjanty doŭha nie mahli jaho ŭcichamiryć. U vyniku samalot pryziamliŭsia ŭ Finlandyi, a ŭžo adtul pa sušy Dacyka dastavili ŭ adzinočnuju kamieru ŭ «Kriesty». Tam jamu ŭ dadatak da abvinavačańnia ŭ rabavańniach było vystaŭlenaje novaje — u niezakonnym pierasiačeńni miažy. U dačynieńni da hetaha aryštavanaha ŭ śledčym izalatary № 1 užyvajucca asablivyja miery biaśpieki: pradpisana ažyćciaŭlać jaho vyvad z kamiery tolki ŭ kajdankach i ŭ prysutnaści kinołaha z sabakam.
Viačasłaŭ Dacyk vielmi krytyčna nastrojeny da ciapierašniaj rasijskaj ułady. Niekalki dzion tamu jon nakiravaŭ prezidentu RF Uładzimiru Pucinu ździeklivylist-zajavu ab ustupleńni ŭ partyju «Adzinaja Rasija». List napisany ŭ dvuch ekzemplarach: na ruskaj movie i na trasiancy.
«Ja chaču stać na staranu Pucina i umieście ź im śmiašać krou paślednich Russkich u Internacyjanalnym miežrassavam sovusie i dabić Russki narod, jaki zabyŭ svaich predkau i praŝurau zaviety i stał rabom i ciarpiłam»,
— tłumačyć svajo imknieńnie ŭstupić u partyju ŭłady Rudy Tarzan.