Dobraje dakumientalnaje kino – redki hość u Hrodnie. Ci nie pieršyja za apošnija hady pakaz i publičnaje abmierkavańnie dakumientalnych filmaŭ zładzili ŭ pačatku červienia pradstaŭniki Asacyjacyi «Biełfilm».
Kala 40 haradziencaŭ roznaha ŭzrostu pahladzieli stužki biełaruskaha režysiora Taćciany Dubaviec «Z žyćcia tutejšych», pryśviečanaha žyćciu ludziej na biełaruska-litoŭskim pamiežžy, a taksama film Dena Ryda «Dalina», u jakim adlustravany kryvavy kanflikt u Kosavie.
Pra metu takich kinapakazaŭ raspaviadaje kiraŭnik asacyjacyi Aleh Daškievič.
- Dakumientalistyka cikavicca nievydumanym, ale realnym čałaviekam, u realnaj, ale nie prydumanaj situacyi. Stupień davieru hledača da takoha kino značna vyšej, čym, skažam, da kino fabularnaha, dzie kožny padspudna razumieje, što heta iluzija.
Možna manić i zajmacca ašukanstvam i ŭ dakumientalnym kino, i my majem šmat prykładaŭ hetaha, ale kožny režysior ryzykuje svajoj karjeraj i miescam u prafiesii.
Dakumientalnaje kino -- heta praŭda. Dać ludziam ubačyć praŭdu, asensavać jaje i zrabić dla siabie vysnovy, badaj takuju metu, taki sens my ŭkładajem u našyja pakazy.
- Jakija ŭražańni zastalisia ŭ ciabie paśla sustrečy z hledačami ŭ Hrodnie?
- Hrodna staŭsia pieršym miestam paśla stalicy, dzie my prapanavali adnu z našych prahram kinapakazaŭ.
Temaj prahramy była nacyjanalnaja samaśviadomaść, i akazałasia, što paśla prahladu filmaŭ Taćciany Dubaviec i Dena Ryda, zvykłyja adkazy na pastaŭlenyja pytańni nie padajucca takimi adnaznačnymi.
Byvajuć momanty, kali vysokaja nacyjanalnaja śviadomaść stavić vielmi vialikija i niebiaśpiečnyja prablemy pierad hramadstvam, što i zaśviedčyła paślaprahladnaja dyskusija ŭ kinazale.