Na zaprašeńnie kiraŭnikoŭ pałat Nacyjanalnaha schodu Biełarusi ŭ Miensk prybyŭ prezydent Parlamenckaj asamblei Rady Eŭropy Rene van der Linden. Jak miarkujecca, jon sustreniecca z uładami i apazycyjaj, pradstaŭnikami hramadzianskaj supolnaści, svajakami palitviaźniaŭ, naviedaje Nacyjanalnuju biblijateku i adzin ź biełaruskich zamkaŭ. U mienskim aeraporcie hościa z Eŭropy sustrakaŭ naš karespandent.

Apošni raz prezydent PARE pryjaždžaŭ u Miensk u 1996 hodzie — u razhar supraćstajańnia A.Łukašenki i Viarchoŭnaha Savietu. Tahačasnaja kiraŭnička PARE Leni Fišer chacieła sustrecca z A.Łukašenkam, ale ŭ jaho na toj čas była zaplanavana hulnia ŭ futboł. Paśla referendumu Biełaruś straciła status admysłova zaprošanaha ŭ PARE i stałasia adzinaj krainaj kantynentu pa‑za Radaj Eŭropy.

Pad čas ciapierašniaha vizytu Rene van der Lindena sustreča z A.Łukašenkam nie planavałasia: jon sustreniecca tolki ź ministram zamiežnych spraŭ, kiraŭnikami pałat Nacyjanalnaha schodu. Asobnyja sustrečy spadara van der Lindena majuć być naładžany ź liderami apazycyi, pradstaŭnikami niaŭradavaha sektaru, svajakami palitviaźniaŭ: jany adbuducca ŭ rezydencyi niamieckaha ambasadara ŭ čaćvier uviečary i ŭ piatnicu ranicaj.

U aeraporcie Rene van der Linden zajaviŭ:

Van der Linden: «Heta ŭdały momant paśla sprečki Biełarusi z Rasiejaj, jakaja pakazała važnaść adkrytaha dyjalohu susiedziaŭ u Eŭropie. Ja spadziajusia, biełarusy razumiejuć, što izalacyja nie źjaŭlajecca šlacham u budučyniu, i my možam abmierkavać, jak nam raspačać dyjaloh».

Kamentujučy vykazvańni pradstaŭnikoŭ biełaruskaj apazycyi nakont taho, što taki vizyt moža ŭsprymacca nehatyŭna, spadar van der Linden skazaŭ:

Van der Linden: «Ja palityk. I całkam niezaležny palityk. Ja prytrymlivajusia tych dumak i pohladaŭ, jakija ja liču pravilnymi».

Spadar van der Linden zaklikaŭ Biełaruś być bližej da Rady Eŭropy i vykazaŭ spadzieŭ:

Van der Linden: «Dziela hramadzian Biełarusi ja spadziajusia, što ŭ budučyni jany dałučacca da Rady Eŭropy. Dziela hetaha patrebny kankretnyja pazytyŭnyja kroki».

Śpikier Pałaty pradstaŭnikoŭ, jaki sustrakaŭ prezydenta PARE ŭ aeraporcie, maje inšuju dumku:

Kanaploŭ: «Dla taho, kab my atrymali status specyjalna zaprošanaha ŭ PARE, nam nijakich krokaŭ rabić nia treba. U krainie ŭsio dla hetaha jość. A pra siabroŭstva ŭžo možna havaryć».

Lider partyi BNF Vincuk Viačorka, jaki ŭviečary maje sustrakacca z prezydentam PARE, miarkuje, što ŭładam nia varta spadziavacca na hety vizyt jak mahčymaść mižnarodnaha pryznańnia Nacyjanalnaha schodu.

Viačorka: «Nijakich asablivych praktyčnych dyvidendaŭ z hetaha režym nie atrymaje. Chiba, prapahandysckija. Spadar van der Linden daŭno chacieŭ pryjechać u Biełaruś — ja ź im nia raz pra heta razmaŭlaŭ. Jon miarkuje, što dahetul padychody da Biełarusi byli chibnymi. I, moža być, jamu ŭdasca novy padychod vypracavać. Nu, kali choča čałaviek pierakanacca, – niachaj atrymaje takuju mahčymaść».

Na dumku spadara Viačorki, prezydent PARE musiŭ by pryjechać z papiarednimi ŭmovami – naprykład, źviarnucca da ŭładaŭ pa dazvoł naviedać palitviaźniaŭ.

Radyjo Svaboda

***

Adkazvajučy na pytańnie karespandenta «Našaj Nivy» pra vizyt u Biełaruś Eŭrakamisara Rene van Lindena staršynia praŭładnaha Sajuzu piśmieńnikaŭ, deputat Savietu Respubliki Mikałaj Čarhiniec skazaŭ, što nie čakaje ad jaho niejkaha karennaha źmianieńnia ŭ adnosinach pamiž Biełaruśsiu i Eŭropaj. Razam z tym Čarhiniec adznačyŭ, što čakaje z boku Eŭropy kanstruktyŭnaha dyjalohu.

Čarhiniec: «Dla nas siońnia važna, kab eŭrapiejski bok prysłuchoŭvaŭsia nia tolki da apazycyi, jakuju pradstaŭlajuć niejkija piać‑šeść čałaviek, ale i da ŭładaŭ, aficyjnaha boku. Tolki kali buduć vysłuchanyja abodva baki, Eŭropa maje prava ŭ niejkich pytańniach krytykavać Biełaruś, tady heta krytyka budzie spraviadlivaj i my jaje, mahčyma, prymiem.

U Eŭropie jość ludzi, jakija chočuć vieści z nami dyjaloh i vizyt van Lindena heta paćviardžaje, ale i Eŭropie jość i bolš mahutnyja siły, jakija nie daduć, kali budzie treba, niekatorym palitykam raźviarnucca ŭ naš bok».

Źmicier Pankaviec

***

Siarod inšych staršyniu Parlamenckaj asamblei Rady Eŭropy (PARE) Rene van der Lindena ŭ Nacyjanalnym aeraporcie Minsk sustrakała Julija Daraškievič:

Fota Julii Daraškievič

Клас
Панылы сорам
Ха-ха
Ого
Сумна
Абуральна