Piać hadoŭ biez Hanny Palitkoŭskaj 1

Hanna Palitkoŭskaja była zabitaja ŭdzień 7 kastryčnika 2006 hoda, u padjeździe doma, dzie žyła. I ŭ toj samy dzień pradstaŭniki pravaachoŭnych orhanaŭ zajavili, što źviazvajuć hetaje zabojstva z prafiesijnaj dziejnaściu žurnalistki.

Śledstva praciahvałasia amal hod, kali na staronki haziet trapili proźviščy 11 zatrymanych u suviazi sa spravaj pra zabojstva Hanny Palitkoŭskaj. Zrešty, z hetych 11-ci tolki čacviora apynulisia ŭ sudzie i paśla byli apraŭdanyja prysiažnymi adnahałosna. Ab prahresie ŭ rasśledavańni zabojstva Hanny Palitkoŭskaj pačali kazać u traŭni sioleta, adrazu paśla aryštu Rustama Machmudava, jakoha śledstva nazyvaje niepasrednym vykanaŭcam. A ŭ kancy leta adbyŭsia jašče adzin hučny aryšt: u izalatar byŭ źmieščany padpałkoŭnik milicyi Dźmitryj Paŭlučenkaŭ. Raniej jon prachodziŭ pa spravie jak klučavy śviedka abvinavačańnia, a ciapier jaho nazyvajuć arhanizataram zabojstva Hanny Palitkoŭskaj. Na dumku advakata Hanny Stavickaj, jakaja pradstaŭlaje intaresy siamji Hanny Palitkoŭskaj, pravaachoŭnyja orhany i rasijskija ŭłady nie nadta ščyravali ŭ raskryćci hetaha złačynstva:

— Kali b ułady rabili ŭsio, što mahčyma, dla pošuku zabojcaŭ Hanny Palitkoŭskaj, to za piać hadoŭ, ja dumaju, heta zrabić było b možna.

I ŭsie asoby, jakija majuć dačynieńnie da spravy, byli b na łavie padsudnych. Na dadzieny momant śledstva ličyć, što znojdzienyja praktyčna ŭsie ŭdzielniki hetaha złačynstva, pačynajučy ad vykanaŭcy, zakančvajučy tym čałaviekam, jaki braŭ zamovy na zabojstva, adnak tak i zastajecca nieviadomym zamoŭca. Kali być abjektyŭnym, to možna skazać, što śledstva dasiahnuła peŭnych pośpiechaŭ, ale kali b śledstva prysłuchoŭvałasia nie tolki da svajoj dumki, ale i da dumki, u pryvatnaści, boku paciarpiełych, to, mahčyma, hetyja zatrymańni adbylisia b na bolš rańnich etapach rasśledavańnia.

Hanna Stavickaja adznačyła, što šmat u čym sprava zrušyłasia ź miortvaj kropki dziakujučy žurnalistam «Novaj haziety», jakija niekalki hadoŭ viali ŭłasnaje rasśledavańnie abstavinaŭ zabojstva Hanny Palitkoŭskaj i dzialilisia zdabytymi źviestkami z udzielnikami śledčaj bryhady. Šef-redaktar «Novaj haziety» Siarhiej Sakałoŭ nie vyklučaje, što novy sudovy razbor pa spravie pra zabojstva Hanny Palitkoŭskaj moža pačacca ŭžo sioleta:

— Śledstva mahło być bolš efiektyŭnym, kali b nie pryŭniesienyja zvonku elemienty:

svarka pamiž dvuma viedamstvami — Hienprakuraturaj i Śledčym kamitetam. Abo vystupy lidaraŭ dziaržavy sa svaimi publičnymi viersijami, jakija śledstva vymušanaje było adpracoŭvać. Kali b nie było takoj karumpavanaj ułady, pravaachoŭnaj sistemy, jakaja pradavała za hrošy ŭsiu infarmacyju, jakaja traplała ŭ «dziažurnuju častku». Usie hetyja pryŭniesienyja abstaviny śledstvu zaminali. Da taho ž, samo pa sabie złačynstva składanaje, choć by tamu, što na łavie padsudnych, dumaju, užo ŭ nastupnym hodzie apynucca vielmi surjoznyja ludzi, jakija mieli dačynieńnie da sakretnych padraździaleńniaŭ HUUS i byli na suviazi z ahienturaj Fiederalnaj słužby biaśpieki, — ličyć Siarhiej Sakałoŭ.

Zrešty, kali ciapier źjaviłasia peŭnaja jasnaść adnosna asobaŭ, jakija arhanizavali i ŭčynili zabojstva Hanny Palitkoŭskaj ŭ 2006 hodzie, to nijakaj peŭnaści z tym, chto vystupiŭ zamoŭcam złačynstva, niama. Pryvodzilisia samyja raznastajnyja viersii, ich vykazvała ŭ tym liku i kiraŭnictva Rasii, ale, na dumku Illi, syna Hanny Palitkoŭskaj, nivodnaja z ahučanych viersij pra zamoŭcu nie nabliziłasia da praŭdy:

— Ja nie chaču skazać, što niechta supraćdziejničaje rasśledavańniu, ale šmat jakija dziejańni istotna zapaźnilisia. U pieršuju čarhu, aryšt adnaho z asnoŭnych arhanizataraŭ — Paŭlučenkava, i mahčymaha kilera Machmudava. Nakont zamoŭcy niama ničoha, akramia zdahadak.

Advakat Hanna Stavickaja pierakananaja: kali čałaviek, jaki zamoviŭ zabojstva Hanny Palitkoŭskaj, maje niepasrednaje dačynieńnie da rasijskaj ułady, to jaho proźvišča tak i nie budzie nazvanaje:

— Kali da zabojstva Hanny Palitkoŭskaj datyčny pradstaŭnik ułady, to chutčej za ŭsio my nikoli nie daviedajemsia jaho imia.

Hanna Palitkoŭskaja była viadomaja svaimi publikacyjami na temu Čačni i Paŭnočnaha Kaŭkaza. Apošni apublikavany pry jaje žyćci artykuł — «Karnaja zmova» — byŭ pryśviečany składu i dziejnaści čačenskich atradaŭ, jakija vajuiuć na baku fiederalnych sił. Dla mnohich, pra kaho pisała i kamu dapamahała Hanna Palitkoŭskaja, jana była nie stolki žurnalistkaj, kolki pravaabaroncam. Čalec praŭleńnia Mižnarodnaha historyka-aśvietnickaha pravaabarončaha i dabračynnaha tavarystva «Miemaryjał» Alaksandr Čarkasaŭ nahadvaje:

— Druhaja čačenskaja vajna, uzbrojeny kanflikt na Paŭnočnym Kaŭkazie, jaki pačaŭsia ŭ 1999 hodzie i praciahvajecca da hetaha času, vyklikajuć u pamiaci publikacyi, imia Hanny Palitkoŭskaj. Niama inšaha žurnalista z takim stylem, z takim umieńniem źviartać uvahu čytača na strašnyja i trahičnyja padziei. Chacia mnohija temy, jakija viała Hanna Palitkoŭskaja, praciahnuli žurnalisty, jaje kalehi.

Nataša Estemirava paśla śmierci Palitkoŭskaj pačała drukavacca ŭ «Novaj», kab častkova kampiensavać hetuju stratu, ale Natašu zabili dva hady tamu. Zieŭra pustečy…

 — padkreśliŭ Alaksandr Čarkasaŭ.

U ciapierašni čas termin śledstva pa spravie ab zabojstvie Hanny Palitkoŭskaj padoŭžany da 7 śniežnia. U redakcyi «Novaj haziety» śćviardžajuć, što źviestki, jakija dapamahli kileru ździejśnić zabojstva žurnalistki i pakinuć miesca złačynstva, dla jaho pastaŭlali dziejnyja na toj momant supracoŭniki milicyi, padnačalenyja aryštavanaha niadaŭna byłoha padpałkoŭnika milicyi Dźmitryja Paŭlučenkava.

Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH