Pierad prysudam Bialackamu Jeŭropa pahražaje sankcyjami Miaśnikoviču, Čyžu i favarytam Łukašenki 14

Jeŭrasajuz moža dadać u śpis nieŭjaznych biełaruskich čynoŭnikaŭ prem'jer-ministra Michaiła Miaśnikoviča, jaho namieśnika Uładzimira Siamašku i staršyniu Dziaržpahrankamiteta Ihara Račkoŭskaha, paviedamlaje brusielskaje internet-vydańnie EUobserver sa spasyłkaj na krynicu ŭ jeŭrapiejskich dypłamatyčnych kołach.

Miaśnikovič, Siamaška i Račkoŭski mohuć być uniesienyja ŭ śpis jak asoby, jakija «naŭprost majuć dačynieńnie da schiem asabistaha abahačeńnia Łukašenki».

EUobserver nahadvaje, što ŭ śpisie asob, jakim zabaronieny ŭjezd na terytoryju ES, užo ŭklučana 245 proźviščaŭ. «I ŭsio jašče jość šmat ludziej dla ŭniasieńnia tudy. Kiraŭniki misij u Minsku (pasły krain ES. — BiełaPAN.) pastajanna pracujuć, prysyłajučy ŭ Brusiel śpisy. Novyja imiony mohuć źjavicca ŭ śpisie ŭ najbližejšyja niekalki dzion abo tydniaŭ», — skazała krynica EUobserver.

Akramia taho, paviedamlaje EUobserver, śpis mohuć papoŭnić biełaruskija biźniesmieny, nabližanyja da Łukašenki. U ich liku nazyvajucca

ŭładalnik hrupy kampanij «Trajpł» Juryj Čyž, staršynia savieta dyrektaraŭ AAT «Amkador», člen Savieta Respubliki Alaksandr Šakucin, uładalnik kampanii «Tytuń-Inviest» i brenda «Karona» Pavieł Tapuzidzis, hiendyrektar SP TAA «Santa-Impeks Brest» Alaksandr Mašenski.

Jak adznačaje brusielskaje vydańnie, žorstkaja reakcyja ES niepaźbiežnaja, kali pravaabaronca Aleś Bialacki,

sudovy praces nad jakim prachodzić ciapier u Minsku, budzie asudžany.

Maja Kačyjančyč, pres-sakratar viarchoŭnaha pradstaŭnika ES pa zamiežnych spravach i palitycy biaśpieki Ketryn Eštan, prakamientavała BiełaPAN hetuju infarmacyju nastupnym čynam: «Našy abmiežavalnyja miery pastajanna pierahladajucca ŭ śviatle novaj infarmacyi abo novaha raźvićcia padziej na miescach. Heta ŭsio, što ja mahu skazać».

* * *

Nahadajem, palityčnaje rašeńnie ab razmarožvańni vizavych i ekanamičnych sankcyj adnosna Biełarusi było pryniataje Savietam ES 31 studzienia ŭ Brusieli, kali ministry zamiežnych spraŭ krain Jeŭrasajuza zaćvierdzili śpis biełaruskich čynoŭnikaŭ, adkaznych za parušeńni pravoŭ čałavieka ŭ chodzie prezidenckaj kampanii. Hetym asobam zabaroniena naviedvać terytoryju ES, a ich rachunki i majomaść u krainach ES pavinny być zamarožanyja. Pieršapačatkova ŭ śpisie było 158 imionaŭ. Potym Saviet ES nieadnarazova pašyraŭ hety pieralik.

Apošni raz vizavy śpis pašyraŭsia 20 lipienia. U jaho byli dabaŭlenyja sudździa i dva prakurory — udzielniki pracesaŭ pa spravie ab masavych biesparadkach 19 śniežnia, a taksama biźniesmien Uładzimir Piefcijeŭ. Jon fihuruje ŭ śpisie jak «asoba, źviazanaja z prezidentam Łukašenkam i jaho siamjoj». «Hałoŭny ekanamičny daradčyk prezidenta Łukašenki i klučavy finansavy sponsar režymu Łukašenki. Staršynia savieta akcyjanieraŭ „Biełtechekspartu“, najbujniejšaj u Biełarusi kampanii impartu-ekspartu ŭzbrajeńniaŭ», — zaŭvažajuć u ES. Sankcyi ES taksama byli nakładzienyja na try biełaruskija kampanija, padkantrolnyja Piefcijevu, — ZAT «Biełtechekspart», ZAT «Sport-pary» i PUP «BT Telekamunikacyi».

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH