Biełaruski vajskovy sud (BVS) 15 listapada abviaściŭ prysudy pa «spravie Hramoviča». Amal usim fihurantam vyniesienyja apraŭdalnyja prysudy.

Słuchańnie spravy pačałosia 21 maja 2010 hoda, pasiadžeńni pravodzilisia ŭ zakrytym farmacie. Da kryminalnaj adkaznaści byli pryciahnuty 36 čałaviek, bolšaść ź jakich źjaŭlalisia słužbovymi asobami mytni «Zachodni Buh» (u tym liku dva namieśniki načalnika mytni i načalnik pasta) i Upraŭleńnia KDB pa Bresckaj vobłaści (były namieśnik načalnika ŭpraŭleńnia, a taksama načalnik adździeła pa baraćbie z arhanizavanaj złačynnaściu i karupcyjaj). Pavodle acenak śledstva, ad niavypłaty mytnych płaciažoŭ dziaržavie byŭ naniesieny ŭron u pamiery zvyš 30 młrd rubloŭ.

U ŚMI hetaja sprava nazvali «spravaj Hramoviča» pa proźviščy aryštavanaha 15 studzienia 2009 h. byłoha dyrektara Departamienta finansavych rasśledavańniaŭ Kamiteta dziaržkantrolu, a raniej namieśnika načalnika Upraŭleńnia KDB pa Bresckaj vobłaści Anatola Hramoviča.

U vyniku BVS pryniaŭ rašeńnie spynić vytvorčaść pa kryminalnaj spravie ŭ dačynieńni da dzieviaci fihurantaŭ za adsutnaściu ŭ ich dziejańniach składu złačynstva. Hetyja ludzi majuć prava na poŭnuju reabilitacyju, až da adnaŭleńnia na raniejšym pracoŭnym miescy.
Jašče 25 abvinavačanych pryznanyja nievinavatymi za niedakazanaściu ŭ častcy učynienych złačynstvaŭ. U ich liku Anatol Hramovič i były namieśnik načalnika mytni «Zachodni Buh» Jaŭhien Sielivanaŭ.

U dačynieńni da jašče čatyroch abvinavačanych kryminalnyja spravy, pa rašeńni BVS, pavinny być nakiravany ŭ Hienieralnuju prakuraturu dla novaha papiaredniaha rasśledavańnia.

Sud uličyŭ, što pa cełym šerahu inkryminavanych artykułaŭ skončylisia terminy daŭnaści pryciahnieńnia da kryminalnaj adkaznaści i na hetaj padstavie kryminalnyja spravy spynienyja. U toj ža čas, jak stała viadoma z abvieščanaj častki prysudu, vielmi mnohija abvinavačanyja ŭ chodzie papiaredniaha śledstva dobraachvotna vydavali niezakonna nažytuju valutu.

Usie hetyja hrošy — zvyš 150 tysiač dalaraŭ — rašeńniem suda źviernutyja ŭ prybytak dziaržavy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?