Viadomaja viciebskaja mastačka Śviatłana Barankoŭskaja niadaŭna pryviezła ŭznaharodu ź pieršaj rasijskaj tryjenale sučasnaha habielena «Kvadratny mietr — svaja prastora», jakaja ź vieraśnia da 7 listapada prachodziła ŭ Dziaržaŭnymmuziei-zapaviedniku «Carycyna» ŭ Maskvie.
Śviatłana Barankoŭskaja pobač z habielenam “Apostał”.
Siastra Vasila Bykava Valancina Uładzimiraŭna pobač z habielenam “Apostał”.
Pieramohu ŭ naminacyi «Paetyka vobraza» atrymaŭ habielen «Apostał». Hetuju pracu, vykananuju ŭ tradycyjnaj technicy habielenu, mastačka pryśviaciła «apostału biełaruskaj nacyi» — piśmieńniku Vasilu Bykavu. Akramia hetaha tvora, S. Barankoŭskaja dasyłała na vystavu jašče dźvie svaje pracy — «Novaja ziamla» (taksama pamiaci Bykava) i «Mieč Śviatahorki» ŭ honar Emilii Plater.
Jak skazała Śviatłana Barankoŭskaja, žury aceńvała kala 350 prac 250 aŭtaraŭ z roznych rehijonaŭ Rasii, a taksama mastakoŭ ź Biełarusi, Ukrainy, Małdovy, Kazachstana i krain Bałtyi. Za paŭtara miesiaca vystavu naviedała bolš za 7 tysiač čałaviek. 7 listapada adbyłosia ŭznaharodžańnie pieramožcaŭ tryjenale. «Bolš za ŭsio mianie ŭraziła toje, što habielen jość navat u jakutaŭ», — padzialiłasia ŭražańniem spadarynia Śviatłana.
Daviedka: Śviatłana Barankoŭskaja skončyła Viciebski dziaržaŭny technałahičny ŭniviersitet. Siabra Sajuza mastakoŭ Biełarusi i Sajuza dyzajnieraŭ Biełarusi. Pastajannaja ŭdzielnica haradskich, respublikanskich i mižnarodnych vystavaŭ. Jaje pracy znachodziacca ŭ pryvatnych kalekcyjach u Biełarusi, Ukrainie, Rasii, Łatvii, Estonii, Hiermanii, Izraili.
