U apošnija dni pracesu pra spravie vybuchu ŭ mietro ŭ Domie pravasudździa prajšli sprečki bakoŭ. Heta byli ci nie samyja nasyčanyja i napružanyja momanty spravy. Dziaržaŭny abvinavaŭca prakuror Stuk zapatrabavaŭ dla abvinavačanych vyšejšaj miery pakarańnia. Advakaty ŭ svaju čarhu ŭkazali na šmatlikija parušeńni, dapuščanyja ŭ časie śledstva i paprasili nie vynosić śmiarotny prysud.
Niezaležnyja ŚMI padrabiazna apisali arhumienty bakoŭ, a taksama niekatorych śviedak ź liku paciarpiełych, jakija mieli mužnaść ahučyć svaje sumnieńni ŭ sudzie.
Dziaržaŭnaja presa taksama nie abyšła ŭvahaj zaviaršeńnie pracesu, ale, u adroźnieńnie ad niezaležnaj, padrabiaznaściami nie paradavała.
«Sovietskaja Biełoruśsija» ŭ ananimnym artykule adznačyła, što ŭ svaich vystupach advakaty «piarečyli adzin adnamu» zamiest taho, kab asprečvać pazicyju abvinavačvańnia i baranić Kanavałava i Kavalova.
Hazieta ŭ źjedlivaj formie padkreślivaje, što advakat Kavalova «abyšoŭsia biez analizu padziejaŭ», što papiaredničali vybucham, zatoje «krasamoŭna krytykavaŭ videazapisy». Pry hetym, u artykule ni słova pra toje, što mienavita ŭ tych videazapisach naściarožyła abaronu. Choć faktyčna tyja videazapisy ličacca ci nie asnoŭnymi dokazami abvinavačańnia. Taksama ni słova ŭ «SB» pra vystupy paciarpiełych, jakija vykazali niedavier da vynikaŭ śledstva.
Infarmacyjnaje ahienctva BiełTA, jakoje dahetul padrabiazna apisvała praces, taksama nie asabliva zasiarodžvałasia na arhumientach advakataŭ. Zatoje asobnaje paviedamleńnie ahienctva pryśviaciła tamu, što advakat Kanavałava nie admaŭlaje abvinavačvańni na adras padabaronnaha pa epizodach 2008 i 2011 hh. Arhumientam prakurora Stuka pryśviečana niekalki paviedamleńniaŭ.
Nahadajem, što vyniasieńnie prysudu zapłanavanaje na 30 listapada 2011 hoda.
