U subotu 12 listapada na płoščy Banhałor u Minsku adbyŭsia Narodny Schod. Hetaj padziei nie pieraškodzili adbycca ni aryšt arhanizataraŭ schodu, ni šmatlikija pradstaŭniki śpiecnaza, jakija pierakryvali padychody da placoŭki schodu.

Funkcyi kiraŭnika schodu ŭziała na siabie dalikatnaja maładaja žančyna, nieabyjakavaja da losu svajho naroda, Halina. Jana raspaviadała prysutnym pra ich pravy, spasyłajučysia na Kanstytucyju Biełarusi, zaklikała vystupić za demakratyzacyju Vybarčaha Kodeksa, źviazvałasia pa telefonie z vydatnymi hramadskimi dziejačami demakratyčnaha kirunku.

Płošča była litaralna našpihavanaja supracoŭnikami KDB, jakija nie daravali Halinie jaje advahi i paśla zakančeńnia schodu hruba schapili jaje i zašturchali ŭ mašynu biez numarnych znakaŭ na vačach u ździŭlenych minakoŭ. Ich nie spynili praklony, jakija sypalisia na ich hałavy ad aburanych žančyn, što stali śviedkami hetaha varvarstva.

Dumaju, nijakimi represijami ŭłada nie ŭtrymaje chvali pratestaŭ suprać źnižeńnia žyćciovaha ŭzroŭniu i biaspraŭja naroda, jakija prakatvajucca pa ŭsich haradach Biełarusi. Bo, u adpaviednaści z art. 3 Kanstytucyi Biełarusi, narod źjaŭlajecca adzinaj krynicaj dziaržaŭnaj ułady ŭ krainie i nośbitam jaje suvierenitetu, a ŭ adpaviednaści z art. 59 Kanstytucyi dziaržaŭnyja orhany i asoby, jakim davierana vykanańnie dziaržaŭnych funkcyj, niasuć adkaznaść za dziejańni, jakija parušajuć pravy i svabody asoby.

Čamu narod Biełarusi ŭbohi i biaspraŭny?

— Bo vakoł dziaržaŭnaj karmuški prystroiłasia šmat bajaźliŭcaŭ, jakija bajacca stracić kavałak tłustaha piraha;

— Bo zakanadaŭstva i jurydyčnaja praktyka krainy majuć represiŭny charaktar u adnosinach da hramadzian, a nie abaraniajuć ich intaresy;

— Bo sa staronak i ekranaŭ dziaržaŭnych ŚMI vylivajucca patoki dezinfarmacyi, zambujučych hramadzian;

— Bo ŭ krainie niama padziełu ŭładaŭ, praduhledžanaha Kanstytucyjaj Biełarusi;

— Bo turmy krainy zapoŭnienyja volnadumnymi ludźmi.

U adnym z vyšejpieraličanych punktaŭ pakazana na płyń dezinfarmacyi, jakaja vylivajucca na hałovy biełarusaŭ sa staronak dziaržaŭnych ŚMI. Śviežańki prykład hetaha — paskvil «Narodny schod» biez naroda», źmieščany na s. 4 haziety «SB. Biełaruś siehodnia» za 15 listapada. Dadzienaja hazieta atrymlivaje značnyja datacyi sa srodkaŭ padatkapłacielščykaŭ na svajo vydańnie. I što ž atrymlivajuć padatkapłacielščyki naŭzamien?

Razhledzim na kankretnym prykładzie. Ukazany śviežańki prykład dezinfarmacyi źmieščany pad rubrykaj «Cha-cha», heta značyć, hazieta prosta śmiajecca nad svaimi karmicielami. Zahałovak «Narodny schod» čamuści uziaty ŭ dvukośsi: aŭtar Siarhiej Siŭcoŭ praciahvaje ździekvacca ź inicyjatyvy svajho naroda. Pojdziem dalej. Pradstaŭnikoŭ naroda jon nazyvaje «dzivakami ź niajasnymi idejami».

Jon śćviardžaje, što narod na schod nie pryjšoŭ. Cikava, kaho ž jon ličyć narodam? Ci ŭ hetym śćviardžeńni ŭtrymlivajecca kanstatacyja taho fakta, što narod na schod śpiecnazaŭcy paprostu nie prapuskali? Tady čamu infarmacyja niapoŭnaja, čamu pra bajcoŭ śpiecnaza nie skazana ani słova?

Aŭtar śćviardžaje pra atmaśfieru nudy na schodzie. Hetaje śćviardžeńnie ŭžo stavić pad sumnieŭ jahonuju prysutnaść na dadzienym mierapryjemstvie, bo zusim nie adpaviadaje rečaisnaści. Jašče bolej sumnievaŭ u kampietentnaści aŭtara vyklikaje jahonaje śćviardžeńnie ab tym, što arhanizatary schodu panyła vykonvali svoj pratestavy numar. Pa-pieršaje, nie było na schodzie arhanizataraŭ, tamu što ich zahadzia schavali za kraty, pra što było ŭžo skazana raniej, a pa-druhoje, čaho-čaho, a zasmučeńnia tam nie isnavała naahuł. Dyk jak ža paznačyć «tvor» «Narodny schod» biez naroda», źmieščanaje ŭ haziecie «Savieckaja Biełaruś»? Što heta? Paskvil? Hulnia chvoraha ŭjaŭleńnia? Ci ideałahičnaja dyviersija? Bo jon kidaje čorny cień na vydańnie, jakoje źjaŭlajecca orhanam dziaržavy! I čamu za takija «tvory» Ministerstva Infarmacyi nie pryciahvaje da adkaznaści zasnavalnikaŭ i aŭtaraŭ dadzienaha vydańnia? Varta było b zadać hetaje pytańnie hetamu ministerstvu, jakoje pavinna stajać na varcie praŭdzivaści infarmacyi, drukavanaj u pieryjadyčnych vydańniach!

Kali ž narešcie źmienicca situacyja ŭ krainie?

— Kali ludzi pačnuć pavažać siabie, pierastanuć bajacca i razam vystupiać za svaje pravy!

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?