Milicyja šukaje Alaksandra Krutoha, źmieščanaha pad vartu ŭ žodzinskaj turmie, jaki pradstaŭlaŭ u sudzie pa terakcie ŭ minskim mietro intaresy svajoj dački Inesy, paciarpiełaj u vyniku vybuchu.

Jak skazała Inesa Krutaja,

dvoje supracoŭnikaŭ milicyi sprabavali vyśvietlić miescaznachodžańnie baćki, pryjšoŭšy da jaje damoŭ viečaram 11 listapada.
Milicyjanieraŭ u kvateru jana nie puściła, jany navat apytvali susiedziaŭ. Heta značyć, jak ličyć Inesa, jany rabili toje, što abaviazany byli zrabić u druhoj pałovie žniŭnia — vieraśni, kali Alaksandr Krutoj niby znachodziŭsia ŭ vyšuku za ŭčynienaje chulihanstva. Nasamreč tady im nichto nie cikaviŭsia, a ŭ druhoj pałovie vieraśnia jon udzielničaŭ u sudovych pasiadžeńniach pa spravie ab terakcie.

Inesa Krutaja taksama paviedamiła, što 25 kastryčnika było vyniesiena zaklučeńnie ekśpiertyzy Alaksandra Krutoha ŭ respublikanskim navukova-praktyčnym centry psichičnaha zdaroŭja. Jon pryznany varjatam. "Ja nie zhodnaja. Ale spračacca bieskarysna, bo ŭ nas niama niezaležnaj ekśpiertyzy", — skazała Krutaja. Jana źviarnuła ŭvahu na toje, što kali baćka pryznany varjatam, to jaho pavinny byli vyzvalić z-pad varty, adnak hetaha nie adbyłosia. Bolš za toje, pavodle infarmacyi Inesy, na padstavie rašeńnia śledčaha baćka nie ŭdzielničaje ni ŭ jakich śledčych dziejańniach, i ŭ jakaści zakonnaha pradstaŭnika jamu — u parušeńnie zakanadaŭstva — pryznačyli jurysta adnoj z paliklinik Maskoŭskaha rajona.

Jak stała viadoma svajakam Krutoha,

pieršy list ad ich za dva z pałovaj miesiacy z času zatrymańnia jon atrymaŭ tolki 4 listapada.

Nahadajem, viečaram 20 vieraśnia Alaksandr Krutoj byŭ zatrymany milicyjaj u Minsku pa abvinavačańni ŭ chulihanstvie. 22 vieraśnia Alaksandr Fiedarcoŭ, jaki staršynstvuje ŭ sudzie pa terakcie, častkova začytaŭ pastanovu ab jaho zatrymańni. U joj skazana, što Krutoj "17 žniŭnia, znachodziačysia ŭ kabiniecie adnoj ź miedycynskich ustanoŭ Minska, naŭmysna ŭčyniŭ chulihanskija dziejańni z asablivym cynizmam i hrebavańniem normami marali". Heta vyjaviłasia ŭ tym, što jon "vyliŭ źmieściva dvuch słoikaŭ z mačoj na hałoŭnaha ŭrača". Pa nakiravańni prakurora Krutoj byŭ adpraŭleny ŭ RNPC psichičnaha zdaroŭja.

U sudzie Krutoj pavodziŭ siabie vielmi aktyŭna, vystupaŭ z šeraham chadajnictvaŭ, u tym liku ab pieranosie pracesu da admieny ŭ Biełarusi śmiarotnaj kary.

Siamja Krutych choča atrymać prytułak u Hiermanii. Zajavu ŭ niamieckaje pasolstva ŭ Minsku Alaksandr Krutoj adnios u vieraśni.

Inesa Krutaja pieradavała ŭ sud chadajnictva ab prypynieńni pracesu da taho času, pakul baćka nie budzie vyzvaleny i nie zmoža pradstaŭlać jaje intaresy ŭ sudzie. 26 vieraśnia sud adchiliŭ hetaje chadajnictva. Sama ŭdzielničać u pracesie Krutaja nie moža pa stanie zdaroŭja.

U pačatku kastryčnika sud Maskoŭskaha rajona Minska pryznaŭ zakonnym źniavoleńnie pad vartu Alaksandra Krutoha. Zatym hetaje rašeńnie paćvierdziŭ haradski sud. Skarha advakata ŭ prakuraturu Maskoŭskaha rajona zastałasia biez zadavalnieńnia. Ciapier abarona źviarnułasia ŭ prakuraturu horada.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?