«Smali»: šmatpaviarchovikaŭ nie budzie, ale ladovy pałac uźviaduć 7

Jak u minčan, jakija płanujuć pierajechać na PMŽ u Smalavičy, tak i ŭ smalevičan, što chvalujucca za budučyniu horada, nabrałosia šmat pytańniaŭ.

Zapusk takich «spadarožnikaŭ» jość nie što inšaje, jak sproba ŭładaŭ utrymać kolkaść nasielnictva stalicy da 2030 hoda ŭ miežach 2 miljonaŭ čałaviek. Bo za apošniaje dziesiacihoddzie nasielnictva Minska pavialičyłasia na 146 tysiač čałaviek, u toj čas jak haradskoje nasielnictva krainy ŭ cełym — tolki na 73 tysiačy čałaviek.

Raźvićcio haradoŭ-spadarožnikaŭ mahčymaje ŭ niekalkich varyjantach: jak asobnaha administracyjnaha ŭtvareńnia za miežami haradskoj rysy nasielenaha punkta abo jak adzinaj haradskoj struktury ŭ składzie nasielenaha punkta za košt pavieličeńnia jaho płoščy z adzinym administracyjnym padparadkavańniem.

Darečy, krytyki idei akružeńnia Minska «spadarožnikami» jašče pavinnyja skazać dziakuj biełaruskim uładam za raźvićcio isnych haradskich pasieliščaŭ. Bo byŭ jašče adzin varyjant, praduhledžany dziaržprahramaj: stvareńnie novych haradoŭ-spadarožnikaŭ z nula. Chutčej za ŭsio jany pieratvarylisia b u čarhovyja «spalnyja» rajony biez raźvitaj dzionnaj sacyjalnaj infrastruktury i z abmiežavanymi mahčymaściami dla zaniataści žycharoŭ.

Finansavać budaŭnictva staličnych žyłych rajonaŭ u haradach-spadarožnikach, darečy, treba budzie ŭsioj krainie. Na hetyja mety pojduć srodki arhanizacyj i nasielnictva, respublikanskaha biudžetu, abłasnych i rajonnych biudžetaŭ, biudžetu Minska, inavacyjnaha fondu Minenierha, srodki enierhazabieśpiačalnych arhanizacyj, jakija ŭvachodziać u skład DVA «Biełenierha», i hazazabieśpiačalnych arhanizacyj, jakija ŭvachodziać u skład DVA «Biełpalivahaz».

Pavodle papiaredniaj acenki, dla ŭźviadzieńnia 1 miljona kv. mietraŭ žylla ŭ Smalavičach spatrebicca kala 4 trłn rubloŭ. Praŭda, u cenach 2010 hoda, jakija, mabyć, daviadziecca pieraličvać.

U budaŭnictva ŭ Smalavičach žyłoha rajona ahulnaj płoščaj 1,3 młn kv. mietraŭ, na jakoj miarkujecca pasialić 44 tysiačy čałaviek, płanujecca ŭkłaści 5280 młrd rubloŭ.

A na vykanańnie padrychtoŭčych rabot, u tym liku budaŭnictva pazaplacovačnych inžyniernych sietak i zbudavańniaŭ, dadatkova spatrebicca jašče 150–170 miljardaŭ rubloŭ u najbližejšych 3–4 hady.

Jašče 120 miljardaŭ rubloŭ — vydatki na druhi etap realizacyi prahramy: budaŭnictva małapaviarchovaha siadzibnaha žyłoha rajona ŭ Smalavickim rajonie pamiž nasielenymi punktami Vialikaje Załužža — Dubovik — Vysokaja Hara ahulnaj płoščaj 700 tys. kv. mietraŭ (pry płoščy siadzibnaha ŭčastka 0,12–0,15 ha i siadzibnaha doma — 120–250 kv. mietraŭ) z kolkaściu nasielnictva da 14 tysiač čałaviek.

Zavablivać minčan u Smalavičy haradskija ŭłady źbirajucca pa pryncypie «čas — hrošy». Bo kab pabudavacca pa čarzie ŭ Minsku, stajać u joj davodzicca hadami, a na Smalavičy popyt pakul nievialiki, značyć, i abzavieścisia kvateraj tut možna značna chutčej. Tym bolš što pavodle niadaŭniaha prahnozu Ministerstva ekanomiki na 2012 hod, u vypadku zachavańnia vysokich abjomaŭ emisijnaha kredytavańnia ekanomiki devalvacyja biełaruskaha rubla moža skoknuć da ŭzroŭniu 22 tysiač rubloŭ za dalar. A heta značyć, što i ceńnik na kv. mietr moža ŭźlacieć nie na žart.

— Košt kvadratnaha mietra adnaznačna budzie nie nižejšy, čym u Minsku. Na dadzieny momant dla ilhotnikaŭ heta kala 3 miljonaŭ rubloŭ za mietr. Nijakich dadatkovych ilhot, akramia dziejnych, pa kredytavańni lhotnaha žylla ŭ haradach-spadarožnikach praduhledžana nie budzie, — kaža staršynia kamiteta budaŭnictva i inviestycyj Minharvykankama Alaksandr Damienikan.

Siońnia Smalavičy ŭjaŭlajuć saboj siaredniestatystyčny biełaruski rajcentr: niesamavity haradok, što zastyŭ u časie i zachavaŭ viaskovy kałaryt.

— My lubim svoj horad i chočam, kab jon raźvivaŭsia. Užo dva hady kažuć, što pojduć inviestycyi, ale pakul u nas tatalnaje biespracoŭje, a moładź zdavolvajecca adnym Domam kultury. Nie chapaje dziciačych sadkoŭ i paliklinik. U horadzie niama nivodnaj parkoŭki. Pad Smalavičami ŭ miastečku Zialony Bor niekali daŭno złamałasia stancyja abiezžalezvańnia vady. Da hetaha času jaje nie adramantavali, tamu ŭ horadzie prosta žudasnaja vada, — kaža pradstaŭnik hramadskaj inicyjatyvy «Za novyja Smalavičy» Anastasija Vasiljeva.

Pavodle jaje słoŭ, u Jeŭropie na budaŭnictva haradoŭ-spadarožnikaŭ vyłučajucca vielizarnyja hrošy dla stvareńnia technałahičnych ekałahičnych prajektaŭ. Heta i robicca prynadaj dla žycharoŭ miehapolisa.

Jakija «fiški» płanujuć pry zabudovie Smalavičaŭ, «EJ: Nieruchomaść» pasprabavała vyśvietlić u hałoŭnaha architektara prajekta.

Jak vyjaviłasia, płan zabudovy Smalavičaŭ užo paśpieŭ zaznać niekatoryja źmieny. Tak, miarkujecca, što ŭ pieršym horadzie-spadarožniku buduć budynki vyšynioj try-piać, maksimum siem pavierchaŭ, choć pieršapačatkova płanavałasia zabudova ŭ 9–12 pavierchaŭ.

— Hleba na hetym učastku prosta ahidnaja — sucelnyja tarfianiki. Tamu budavać tut vielmi ciažka, — skardzicca hałoŭny architektar prajekta Alhierd Śvirski.

Uzdoŭž raki Plisa, jakaja praciakaje pa horadzie, raźmieścicca stadyjon, zabaŭlalnyja centry, abjekty hramadskaha charčavańnia, handlu, ladovy pałac i teatr. Taksama ŭ horadzie buduć carkva, kinateatr, handlovy centr z parkinham, praduhledžana mnostva parkovačnych miescaŭ.

— Kvatery ŭ Smalavičach buduć typavyja. Asnoŭnaja meta — heta zabiaśpiečyć jak maha bolš ludziej žyllom.

Ciapier najbolšy popyt na adna-, dvuchpakajovyja i kvatery-studyi, dzie jość tolki kuchnia i vannaja, a ŭsio astatniaje miesca — pustaja prastora bieź lišnich kalidoraŭ. Atrymlivajecca značna tańniej, čym zvyčajnaja kvatera, akramia taho, čałaviek moža sam prajektavać svajo žyllo, — kaža hałoŭny architektar prajekta.

Što da pracaŭładkavańnia žycharoŭ haradoŭ-spadarožnikaŭ, miarkujecca, što častka ź ich budzie pracavać na pradpryjemstvach, jakija, zhodna ź dziaržprahramaj, płanujecca vynieści ź Minska ŭ harady-spadarožniki.

— Žyllo pavinna być pobač ź miescam pracy. Kali 50 tysiač smalevičan kožny dzień praktyčna ŭ adzin čas buduć jechać na pracu i z pracy, ujaŭlajecie, jaki heta budzie kałaps?

Tamu my pasprabujem zrabić tak, kab u haradach-spadarožnikach byli pracoŭnyja miescy, pryčym nie tolki na pradpryjemstvach, ale i ŭ śfiery pasłuh, — kaža Alaksandr Damienikan. — Taksama haradžanie buduć zabiaśpiečany janaležnaj sacyjalnaj śfieraj: škołami, dziciačymi sadkami, paliklinikami, kramami, zabaŭlalnymi centrami.

Pavodle jaho słovaŭ, pakul detalova nie razhladałasia pytańnie ab znosinach pamiž Minskam i Smalavičami, ale jość zaduma puścić pamiž haradami chutkasnuju elektryčku.

realty.ej.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH