U apošnija dni rezka ŭzrasła kolkaść zahinułych u DTZ, asabliva piešachodaŭ 3

U Biełarusi na fonie paharšeńnia nadvorja ŭ apošnija dni rezka ŭzrasła kolkaść zahinułych u darožna-transpartnych zdareńniach, asabliva piešachodaŭ.

Ab hetym BiełaPAN paviedamiła staršy inśpiektar pa asablivych daručeńniach upraŭleńnia Dziaržaŭtainśpiekcyi MUS Hanna Banadyk.

Pavodle jaje słoŭ, za 18–20 listapada na darohach krainy adbyłosia 60 DTZ, u jakich 21 čałaviek zahinuŭ i 63 atrymali ranieńni. Siarod zahinułych — 11 piešachodaŭ. Ź ich troje pierachodzili darohu pa-za piešachodnym pierachodam, dvoje znachodzilisia na prajeznaj častcy, adzin piešachod lažaŭ na prajeznaj častcy, troje išli pa krai prajeznaj častki ŭ spadarožnym napramku. Usie jany byli bieź śviatłoadbivalnych elemientaŭ. Adzin piešachod byŭ źbity, znachodziačysia na abočynie, jašče adzin — na nierehulujemym piešachodnym pierachodzie na 270 km aŭtadarohi Minsk — Hrodna.

Supracoŭnikami DAI vyjaŭlena 2.750 parušeńniaŭ Praviłaŭ darožnaha ruchu piešachodami, ź ich 1.508 pryciahnuty da administracyjnaj adkaznaści za znachodžańnie na prajeznaj častcy ŭ ciomny čas sutak bieź śviatłoadbivalnych elemientaŭ.

Tydzień tamu, 11–13 listapada, u vyniku DTZ u Biełarusi zahinuli 11 čałaviek i 53 byli traŭmavanyja. Siarod zahinułych — troje piešachodaŭ.

U suviazi z najaŭnaj abstanoŭkaj z 21 pa 30 listapada Dziaržaŭtainśpiekcyja pravodzić respublikanskuju prafiłaktyčnuju akcyju «Aściarožna — piešachod!».

U hety pieryjad budzie pravodzicca šyrokaja infarmacyjna-tłumačalnaja rabota ab praviłach biaśpiečnych pavodzin na darozie siarod piešych udzielnikaŭ darožnaha ruchu i vadzicielaŭ jak niepasredna na darozie, tak i ŭ pracoŭnych kalektyvach, ustanovach adukacyi.

Budzie aktyvizavana rabota ŭsiaho asabovaha składu orhanaŭ unutranych spraŭ pa papiaredžańni DTZ z udziełam piešachodaŭ u ciomny čas sutak i pryvićcia nasielnictvu navykaŭ vykarystańnia śviatłoadbivalnych elemientaŭ.

Zychodziačy z analizu miescaŭ kancentracyi DTZ z udziełam piešachodaŭ, asabliva na aŭtamabilnych darohach, jakija prachodziać praz nasielenyja punkty, siłami naradaŭ darožna-patrulnaj słužby budzie zabiaśpiečany kantrol za vykanańniem PDR usimi ŭdzielnikami darožnaha ruchu.

U ramkach akcyi buduć praviedzieny ekśpierymienty dla ŚMI, jakija nahladna pakažuć bačnaść piešachodaŭ na darozie (ź flikieram, bieź flikiera, u ciomnym, śvietłym adzieńni) z sałona aŭtamabila ŭ ciomny čas sutak, ź blizkim, dalokim śviatłom far i h.d.

Viačasłaŭ Budkievič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH